Ginang nga wa na mouli sa ilaha gidunggab sa bana

CEBU, Philippines - Nakaangkon og upat ka samad sa bukobuko ang usa ka ginang nga nabiktima sa pagpanunggab sa iyang kaugalingong bana alas- 8 pasado ang takna sa miaging gabii sa barangay Ibabao, lungsod sa Cordova.

Si PO3 Melisa Tampus sa Women’s Section sa kapolisan sa maong lungsod miila sa biktima mao si Analyn Uliamat Ferrer, 37, kinsa giunay og dunggab sa iyang bana nga si Josep Ferrer, 39.

Matud pa ni Tampus nga wala na magkasinabtanay ang duha sa ilang panagtipon nga maoy hinungdan nga mibalhin og puyo ang biktima ug nangabang og laing panimalay apan diha ra gihapon sa maong dapit.

Dugang pa niya nga nakigbulag ang asawa apan ang bana nga wala na makaagwanta nga nagtan-aw sa iyang asawa nga nagpuyo og laing panimalay kalit misaka ug giawhag kini sa pagpauli sa ilang balay.

Apan misangpot hinuon sa kagubot ang nahitabo sa duha ug miresulta sa pagdunggab sa suspek sa iyang asawa.

Human niini mibiya sa maong dapit ug dali usab nga gitabang sa mga silingan ug gidala ngadto sa Vicente Sotto Memorial Medical Center sa dakbayan sa Sugbo.

Si Tampus miingon nga paglabay sa pipila ka oras mitahan sa iyang kaugalingon ang suspek, kasong kalapasan sa Violence Against Women and Children ang gikatakdang ipasaka batok sa suspek. (/EIM)  (BANAT NEWS)