Trak nga nakalatay og mabdos bag-o pang nadakpan sa PENRO
CEBU, Philippines - Gikompirmar ni Compostela Mayor Joel Quiño nga iya ang dump truck nga nakadasmag patay sa usa ka mabdos sa Barangay Sabang, dakbayan sa Danao niadtong Sabado sa hapon.
Matud pa ni Quiño nga ang maong sakyanan mao usab ang usa sa upat nga nadakpan sa Provincial Environment and Natural Resources Office (PENRO) - Capitol Monitoring Team niadtong Huwebes sa kalapasan sa ordinansa sa paghakot og anapog.
“Demalas gyud,” matud pang Quiño. Ang dump truck nga may plate number YJO 217 gimaneho ni Marito Capua sa barangay Dapdap, Compostela maoy nalambigit sa maong aksidente.
Ang maong sakyanan gikan pa nakabuhi gikan sa kustodiya sa PENRO-Capitol human si Quiño nibayad sa multa. Wala mogawas ang pangan ni Quiño sa rekord sa PENRO-Capitol bisan gituohan nga iya ang maong sakyanan sanglit lain ang pangan sa nabutang nga tag-iya niini.
Nipadayag hinoon si Quiño sa kaandam sa paghatag og ayuda sa biktima sanglit may insurance man usab ang iyang sakyanan. “Ang disgrasya man ang niduol sa amo,” matud pang Quiño.
Subay sa imbestigasyon, ang biktima angkas sa motorsiklo sa iyang bana gikan sa Cebu Mitsumi Inc. diin siya nagtrabaho. Giingong nakadasmag sila sa usa ka dalagita nga kalit nilabang sa karsada hinungdan sa pagkalagpot sa biktima gikan sa motorsiklo ug hinungdan nga nalatayan kini sa maong dump truck. (Gregg M. Rubio/EIM) (BANAT NEWS)
- Latest
