Tourist police center gisubhan

CEBU, Philippines - Pormal nang gisubhan ang bag-ong Tourist Police Assistance Center (TPAC) sa Sitio Buyong, Brgy. Maribago dakbayan sa Lapulapu kagahapon sa buntag.

Personal nga mitambong si Lapulapu City Mayor Paz Radaza, PNP PRO 7 Chief of Staff Josephus Angan, Lapulapu City Police Office Director P/SSupt. Anthony Obenza, TPAC Chief P/Supt. Percival Zorilla ug Maribago Brgy. Captain Joseph Pangatungan.

Matu pa ni Mayor Radaza nga ang katukoran sa TPAC building sa Brgy. Maribago tipik lamang sa tulo ka edipisyo nga iyang ipatukod nga kadangpan sa mga turista kung makasugat kini og mga problema. Gawas sa TPAC Maribago ang balor og P400 mil    nga edipisyo tukoron usab alang sa TPAC sa Brgy. Marigondon ug Brgy. Mactan sa susamang katuyoan.

Usa sa nakahatag og dakong pagsulbong sa ekonomiya sa dakbayan sa Lapulapu mao ang turismo hinungdan nga angayan gyud nga protektahan ang mga langyaw ug lokal nga turista nga mobisita sa dakbayan, sumala ni Radaza.

Samtang si SSupt. Angan sa iyang bahin mapasalamaton kaayo sa suporta nga gihatag sa LGU sa Lapulapu ngadto sa ilang mga sakop nga gihatagan og importansiya ang mga panginahanglan ug kakulangan nga dili tanan mahatag sa PNP.

Gipaniguro ni SSupt. Angan nga bugtian kini sa maayong serbisyo sa ilang mga sakop ilabi na sa Tourist Police nga maoy derektang kadangpan sa mga turista nga makasugat og problema.

Matud pa ni SSupt. Obenza nga 30 ka mga PNP personnel ang idistino pabantayon sa TPAC ug madugangan unya kini kung ikahatag na sa PRO 7 ang ilang gipangayong dugang PNP personnel sa dakbayan sa Lapulapu.

Midugang si Obenza sa pagpahibawo nga iya nang giduso ang mga ngalan ngadto ni PRO 7 Regional Director P/CSupt. Marcelo Garbo sa dul-an 50 ka mga polis nga kinahanglang idugang pwersa sa kapolisan sa dakbayan sa Lapulapu.

Ang mga sakop sa Tourist Police daan nang gibansaybansay sa mga pamaagi sa pag-rescue sa kadagatan ug sa bisan pa sa kakulangan sa ilang mga ekipo. Nagmalaumon si Supt. Zorilla nga gawas sa ilang pumpboat ug rubber boat nga gigamit alang sa pagpatrolya sa kadagatan mahatagan usab sila og mga kahimanan sa ilawom sa kadagatan alang sa ilang rescue operations ug pagpanglimpiyo ilawom sa dagat. (BANATNEWS)