CLO nabalaka sa pagdawat og donasyon alang sa CCMC

CEBU, Philippines — Samtang nagpadayon ang mga diskusyon kabahin sa paghuman sa Cebu City Medical Center (CCMC), ang Cebu City Legal Office (CLO) nipadayag og mga kabalaka kabahin sa tripartite agreement sa donation drive lakip ang authority sa Cebu Medical Society (CMS) sa pagdawat niini nga mga donasyon.

Gibana-bana nga kapin sa usa ka bulan human nila opisyal nga nadawat ang hangyo nga i-review ang tripartite agreement alang sa donation drive alang sa pagtukod sa 8th, 9th ug 10th floor sa CCMC, ang CLO nipadala sa ilang opinyon ngadto sa konseho sa siyudad aron mangayo og second opinion ug legal nga katin-awan.

Gikatakdang tukion sa konseho sa Dakbayan sa Sugbo ang gihatag nga opinyon atol sa regular session karong adlawa.

Ang legal nga opinyon nga penetsahan og Nobiyembre 4, 2024 gitumong ngadto kang Attorney Ken Lanvin Sayruddin, special assistant for legal matters sa CCMC.

Giklaro nga ang MOA ipatuman tali sa CMS, Dakay Construction and Development Corporation (DCDC) ug sa Cebu City Government.

Base sa ilang legal nga opinyon, ang CLO nituki sa tulo ka isyu nga alang kanila kinahanglan nga sulbaron.

Ang maong mga isyu gilangkuban sa nature sa donations; ang katungod sa CMS sa pagdawat sa donasyon; ug ang kinahanglanon sa usa ka public bidding alang sa contractor sa proyekto.

Lakip sa gipangayoan sa CLO og katin-awan mao ang pagtugot sa CMS nga modawat sa cash donations alang sa siyudad sa paghuman sa CCMC.

Gipadayag sa CLO nga ang CMS nakadawat og P100 milyones nga donasyon alang sa CCMC project.

Giingong sa usa ka board resolution sa CMS, ang CMS niuyon nga mahimong "trustee" apan adunay konsiderasyon sa usa ka “trust management fee”.

Lakip sa mga rekisitos nga gitumbok sa CLO nga kinahanglang kuhaon sa CMS mao ang permit gikan sa mga regional offices sa Department of Social Services and Development nga nalatid sa Integrated Reorganization Plan.

Niawhag ang CLO nga sa dili pa mapirmahan ang Tripartite MOA kinahanglan nga matino una nga ang CMS adunay sakto nga mga permit o legal nga authorization aron modawat sa mga donasyon o kontribusyon alang sa proyekto sa CCMC.

Gituki usab sa CLO ang isyu sa giingong kakuwang sa pagbutyag sa mga donor ug ang kantidad nga nahatag. (BANAT NEWS)