Negosyante gipatay sa iyang kapuyo

CEBU, Philippines - Gipusil patay sa iyang kapuyo ang usa ka babayeng negosyante taliwa sa ilang init nga panaglalis sulod sa ilang tindahan sa barangay Langtad siyudad sa Naga niadtong Biyernes sa alas 8:10 sa gabii.

Ang biktima mao si Lorna Cana, negosyante og sari-sari store sa maong lugar samtang ang suspek mao ra ang iyang kapuyo nga si Nestor Soreso, 54.

Matud ni PO1 Ronjie Nadorra, desk officer sa Naga City Police Station dihang nahinabi sa Banat News subay sa imbestigasyon gikan sa mga saksi nga nakadungog silang nag-away ang duha sulod sa tindahan.

Apan paglabay sa pipila ka minutos milanog ang buto sa armas ug pagkahuman nagdaling migawas si Soreso nga nagbitbit og armas nga kalibre .45 ug nagdaling misakay og motorsiklo paingon sa lungsod sa San Fernando nga direksyon.

Gisuwayan pa unta og hatud ang biktima sa Minglanilla District Hospital apan gideklarar nga dead on arrival sa mga doktor tungod kay nasentro sa nawong ang bala nga nakaingon sa hinanali niyang kamatayon.

Ang mga polis naka-recover og kabhang sa kalibre .45 nga gituohang gikan sa armas sa suspek kinsa ilahang nasikop sa hot pursuit operation sa ilang balay sa North Poblacion sa lungsod sa San Fernando apan wala na kaniya ang armas.

Nagduda ang kapolisan nga ang panag-away nila maoy hinungdan sa maong pagpatay apan padayon pa ang ilang imbestigasyon kalabot sa nahitabo. (BANAT NEWS)