Quisumbing mipahigayo'g medical mission

CEBU, Philippines -  Gatosan ka mga kabataan ug mga hingkod ang nakapahimulos sa gipasiugdahang duha ka hugna nga medical mission ni 6th District Congressman Luigi Quisumbing sa barangay Cubacub ug barangay Bakilid ug mga sikbit niining barangay, dakbayan sa Mandaue sa miaging adlaw.

Ang maong medical mission nga gipasiugdahan sa buhatan ni Quisumbing naglakip sa libreng pagpanuli, libreng pagpatupi, libreng check up sa panglawas ug libre usab ang tambal niini.

Si Quisumbing nga nahinabi sa Banat News miingon nga sa barangay Cubacub ang medical team gipangunahan sa Philippine Navy ug siya (Quisumbing) isip reservist miayuda usab sa pagpanghatag og mga tambal.

Samtang ang laing medical mission gipangunahan usab sa Norkis Alumni Association, Rotary Club ug Benedicto College kinsa mipadala sa ilang 33 ka mga nurse.

Mikabat sa 40 ka mga doktor ang nagtinabangay sa pagtuli sa kabataan ug pag-check -up sa panglawas sa mga senior citizens ug 14 usab ka mga dentista ang mipahigayon sa paglimpiyo sa ngipon sa kabataan ug pag-ibot niadtong dautan nang ngipon.

Si Jessie Perez nga maoy chief executive sa buhatan ni Quisumbing nga nahinabi sa Banat News miingon nga ang buhatan sa kongresista miayuda usab sa paghatag og mga tambal sa tinguha niini nga magmalampuson ang pag-check- up sa panglawas sa mga kabus nga Mandauehanon.

Si Perez miingon nga ang medical mission nga tibuok adlaw niadtong Sabado didto ipahigayon sa PICC compound nga gipanag-iya sa Norkis Trading Corporation .

Ang mga molupyo sa barangay Bakilid, barangay Cabancalan, ug barangay Maguikay maoy nakapahimulos sa nahisgotang libre nga serbisyo. (/WC) (BANAT NEWS)