Radiation alert nakapabalaka

CEBU, Philippines - Gipasalig sa Department of Health (DOH) sa publiko nga walay radiation leak gikan sa Fukushima nuclear power plant sa Japan nga moabot dinhi sa Pilipinas niining mga panahona.

Sa report sa GMA News.Tv., si DOH Undersecretary Mario Villaverde misalikway sa mga tabi-tabi nga ang radiation gikan sa miulbong nuclear power plant sa Japan tungod sa 8.9-magnitude nga linog ug nasundan og tsunami niadtong Marso 11 makaapekto dinhi sa Pilipinas.

Samtang sa gipagawas usab nga pamahayag sa Philippine Information Agency, si Department of Science and Technology-Philippine Nuclear Research Institute (DOST-PNRI) secretary Mario Montejo miingon nga wala mosaka ang radiation levels dinhi sa Pilipinas human sa nahitabo sa Japan.

Ang mga awtoridad sa Japan naningkamot mapugngan ang ‘meltdown’ sa ilang nuclear plant sa Fukushima human mokagar ang cooling systems niini.

Ang mga awtoridad sa Japan padayong naninguhang   ma-contain ang hinungaw sa radiation apan wala kaayo sila mabalaka sa public health safety gumikan kay kontrolado nila ang sitwasyon gawas lamang sa mga dapit nga duol gyud sa palibot sa maong planta.

Gipasabot usab sa DOST-PNRI nga dili masusama sa Chernobyl accident sa Ukraine ang nahitabo sa Fukushima tungod kay ang reactors sa Japan bisan mag-meltdown dili makagawas sa containment facility niini ang radiation, butang nga wala kaniadto sa Chernobyl plant dihang nahitabo ang meltdown niini.

Kagahapon, adunay pipila ka mga tawong walay lingaw ang nagpakatap og text message nga nagkutlo sa usa ka international news agency nga nagkumpirmar sa maong leak ug giingong alas-4 sa hapon kagahapon moigo ang radiation leak.

Pipila sa mga text nag-ingong moulan og asido o ‘acid rain’ samtang adunay nag-ingong magdala og thyroid cancer ang radiation, gimandoan ang publiko nga mosulod sa ilang mga balay ug dili mangabli sulod sa 24 oras.

Aduna pay mi-text nga papahiran og Betadine ang liog aron maprotektahan ang thyroid.

Ang Polytechnic University of the Philippines (PUP) kagahapon mipapauli sa ilang mga tinun-an tungod sa maong text bisan dili beripikado ang maong text.

Si Villaverde miingon nga bisan layo sa radiation ang Pilipinas ang DOH nangandam gihapon sa worst case scenario sama sa pag-andam sa prophylactic dose sa potassium iodide nga gamiton batok radiation exposure, dugang pa ni Villaverde nga mahimo rang matangtang pinaagi sa pagkaligo ang radiation kun dili direkta ang exposure.

Ang National Disaster Risk Reduction Management Council (NDRRMC) mibutyag nga kun sa higayon nga adunay susamang trahedya dinhi awtomatikong i-activate ang National Radiological Emergency Preparedness and Response Plan (RADPlan).

Si Neil Sanchez, ang operations officer sa Office of the Civil Defense mipahimangno sa publiko nga pabiling alikmat tungod niining mga binuang sa mga text tungod kay kini magbunga hinuon og panic sa publiko.

Apan sa pagkakaron ang direksyon sa hangin nagpadulong sa Japan gikan sa Pilipinas sumala pa sa Philippine Atmospheric Geophysical and Astronomical Services Administration (PAGASA).

Giklaro usab nga ang radiation mahimong mokuyog sa sulog sa dagat apan ang sulog giesplikar ni Villaverde mag-uban asa padulong ang hangin maong imbes paduol sa Pilipinas palayo hinuon kini.   (BANAT NEWS)