24-anyos nga dalaga, inahan sa uyab gipamusil sa nagmotor

CEBU, Philippines - Usa ka 24-anyos nga babaye ang talandugon ang kahimtang human kini gitusak og bala sa usa ka wala mailhing lalaki diha sa dalan F. Llamas sa Barangay Punta Princesa niadtong gabii sa adlaw’ng Sabado.

Ang biktima giilang si Faith Rabanes, residente sa dalan St. Francis, Don Bosco Village, Pleasant Homes Subdivision sa samang barangay.

Sumala pa sa imbestigasyon sa Homicide Section, kauban sa biktima ang inahan sa iyang uyab nga si Vicky Guarde, 49, niadtong tungura luwan sa usa ka Toyota Revo (YAA-200) nga gimaneho ni Guarde.

Matud pang Batucan si Rabanes diha sa front seat nianang tungora ug pag-abot sa maong dapit mikanaog si Rabanes aron mopalit og pan sa panaderohan apan sa iyang pagsakay og balik kalit nga miduol ang gikatahapan ug mibarog sa passenger side ug gipamusil ang duha.

Si Rabanes naigo sa tuong tampihak, duha sa tuong bukton, samtang si Guarde natapsingan sa tuong dapidapi. Ang duha pulos gidala sa Chong Hua Hospital.

Matud pa ni PO2 Jodan Batucan ang mga saksi mihulagway sa mamumuno nga gibana-banang 40-anyos ug ang drayber tomboy kinsa daling nangikyas.

Nakuha sa kapolisan diha sa crime scene ang pito ka basiyo sa bala sa kalibre .45, duha ka slugs sulod sa sakyanan ni Guarde.

Nagduda si Batucan nga business-related ang motibo sa pagpamanhig sanglit negosyante si Guarde.

“Posible na negosyo ang motibo. Realtor man ni si Guarde, engaged na siya sa buy and sell og yuta. Napagan na lang ni si Rabanes. Sa amo sad interbyu ni Vicky, dili man siya kaayo cooperative. Mura man siya’g nay something nga gitaguan,” matud pang Batucan. (BANAT NEWS)