Namuyo, vendors sa mga sam-ang papahawaon gyud sa maong lugar

CEBU, Philippines - Dili na matuis ang hukom sa Simbahan may kalabotan sa pagpapahawa sa mga informal settlers ug mga vendors sa mga sam-ang dinhi sa syudad sa Sugbu. Kini mao ang gibutyag ni Msgr.Roberto Alesna ang Kura Paroko sa Cebu Metropolitan Cathedral kinsa mibutyag nga mao kini ang nakab-ot nilang hukom human sa usa ka dialogue uban sa mga kaparian ug sa mga apektadong vendors ug mga lumulupyo sa mga sementeryo.

Matud pa ni Msgr.Alesna nga positibo ang bunga sa maong dayalogo ug mismo ang mga lumulupyo na ang nangunay pagpamutos sa ilang mga butang agi’g tambag usab nila aron likayan na nga moabot pa sa punto nga ang Squatters Prevention Encroachment Elimination Division (SPEED) maoy mangunay pagpapahawa nila.

“Actually, ang simbahan pa gani ang mi-provide nila og mga truck aron dili sila maglisod pagpanghakot sa ilang mga butang,” matud pa ni Msgr.Alesna.

Nasayran nga niadtong miaging buwan pa nakadawat og suwat nga nagmando sa pagpapahawa sa mga vendor ug mga nanimuyo sa sementeryo sa dili pa ang Nobiyembre 2.

Hinuon, giklaro ni Msgr.Alesna nga gawas sa ilang pag-amuma sa mga sam-ang nga gipanag-iya sa Archdiocese sa Sugbu nga gidumala sa Metropolitan Cebu Cathedral, lakip usab ang maong lakang sa clean-up drive nga gipakusgan karon sa City government.

Kabahin sa relokasyon sa mga gipapahawa nga mga lumulupyo, gitino ni Msgr.Alesna nga responsibilidad na kini sa kagamhanan sa Sugbu, apan andam usab silang mohatag og ayuda kung mao kini ang mahukman ni Cebu Archbishop Ricardo Cardinal Vidal.

Gihatagan usab og paglaum ni Alesna ang mga vendors nga mamahimo pa sila nga makapamaligya pagbalik kun mao kini ang mahukman ni Cardinal Vidal kinsa atoa karon sa Roma.

“Huwaton una nato si Cardinal kay siya man ang muhatag sa katapusang hukom ani nga problema, pero kun ugaling sugtan sila nga makabalik, kinahanglan na sila nga mutuman sa mga lagda nga ipatuman sa mga sementeryo aron mawagtang na ang mga kawat ug paghugawhugaw,” dugang pa ni Alesna. (BANAT NEWS)