Cebu City ikaupat sa kinadaghanan og kaso sa child pornography – CCWPC

CEBU, Philippines — Na-alarma ang Cebu City Commission for the Welfare and Protection of Children (CCCWPC) human makadawat sa taho gikan sa International Justice Mission nga nagkataas na ang kaso sa online sexual abuse and exploitation of children (OSAEC) sa syudad.

Sa report sa Cebu City News and Information, nagplano na ang CCCWPC nga dungagan ang mga lakang aron sa pagprotehir sa mga bata nga gipahimuslan pinaagi sa online.

Ang CCCWPC executive director nga si Carmelita Helen Francisco nagkanayon atol sa pagpakighinabi niini sa City Nutrition Office’s Saktong Nutrition alang sa Sugboanon teleradyo program pinaagi sa Sugboanon Channel,  nga base sa data nga gipagawas sa IJM, anaa sa ikaupat nga pwesto ang Cebu City lukop nasud sa highly urbanized cities nga adunay tag-as nga kaso sa OSAEC. Wala hinuon mipagawas og numero sa kaso si Francisco kabahin sa data gikan sa IJM.

Apan namatikdan niya nga grabe gyud ang risgo nga mahimong biktima sa OSAEC karon nga nagkadaghan na sab ang mga bata nga na-expose sa paggamit sa cellphone ug social media.

Giangkon ni Francisco nga naglisod sab ang syudad sa pagtino kun kinsa ang mga nalambigit sa OSAEC tungod kay kadaghanan sa mga krimen nahimo sulod sa panimalay.

“Dili sayon pag determine sa usa ka panimalay nga naay biktima sa OSAEC because the victims are within the family ug ang nangabuso sulod ra sad sa pamilya,”matud niya.

Nanghinaot si Franciso aron mapugngan ang pagsaka sa kaso sa OSAEC, nagpasiugda ang CCCWPC og usa ka programa nga gitawag og “Project Safe” nga mapatuman sunod tuig. Mga kawani sa CCCWPC, Department of Social Welfare and Services, Cebu City Women’s Commission, ug ang barangay gender and development (GAD) focals ipaubos og training alang sa maong programa kun diin ipatuman kini sa nagkadaiyang tunghaan sa syudad aron mapakatap sa kinabag-an ang kadaot nga gihatag sa OSAEC.   IBM BANAT NEWS