Barangay Poblacion sa Talisay taas og kaso sa dengue  

CEBU, Philippines — Dako og tabang ang tubig sa dagat nga malikay ang katawhan sa sakit nga dengue.

Kini maoy gipadayag ni Dr. Lino Alanzado, pangulo sa City Health Office sa Dakbayan sa Talisay.

Sayo pa, ang Sitio Asan o gitawag na karon og seawall sa Barangay Poblacion, Dakbayan sa Talisay mao ang adunay pinakadaghang  kaso karon sa dengue.

Matud ni Alanzado nga kaniadto menos kaayo ang ilang matala nga kaso sa dengue diha sa maong lugar sa wala pa ang seawall tungod kay maabot man sa tubig dagat ang mga nagpundo nga tubig.

Apan karon nga aduna nay seawall sa lugar aron ka protektahan sa dagkong bawod ang mga residente nitumaw na ang dengue tungod kay walay kalutsan sa nagpundo nga tubig ang dapit.

Gipadayag ni Alanzado nga adunay nilabay nga katuigan nga ang Barangay Tanke nga usa usab ka coastal barangay ang zero sa kaso sa dengue.

Sa iyang bahin, si Kapitan Edward Alesna, sa Barangay Poblacion nagkanayon nga ilang gipangitaan karon og sulosyon ang maong problema ug gihangyo nila ang katawhan nga manglimpiyo gyud sa ilang palibot aron malikay sa dengue.

Subay niini, ang Poblacion adunay 15 ka kaso sa dengue gikan sa buwan sa Enero hangtud sa buwan sa Oktubre niining tuiga.

Base talaan sa Talisay City Health Office ang Barangay Poblacion maoy adunay pinakadaghang kaso sa Dengue diin kasagaran niini gikan sa Sitio Asan.

Gibutyag ni Alanzado nga siyudad adunay dul-an sa 200 ka kaso sa dengue apan  73 lang niini ang nasutang positibo diin ang suspected lang kini ug walay natalang namatay.

Ug mas ubos ang kaso karong tuiga ikompara sa nilabay’ng tuig diin niabot ngadto sa kapin sa 300 ka kaso.  BDB BANAT NEWS