Gipangutana sa ngalan sa Wa Pa Pusila

CEBU, Philippines - Usa ka lalaki ang naangol human kini gipaulanan og bala sa tawong nangutana sa iyang pangalan diha daplin sa dalan human sa ilang duwa sa basketball niadtong milabay’ng gabii diha sa dalan Balagtas sa barangay Pahina-Central ning dakbayan.

Ang gipusil giilang si Arnold Fernandez, 30, residente sa maong dapit kinsa nakaangkon og samad pinusilan sa ibabaw nga bahin sa iyang walang dughan, walang bukton ug walang batiis.

Usa ka wala mailhing lalaki nga nagsuot og maong shorts, jacket nga itom ug niwangon nga gibana-banang 5’6 ang height ang giingong mipusil sa biktima.

Sumala pang PO3 Geoffrey Gutual sa Homicide Section base sa gihimong imbestigasyon nila ni SPO3 Rey Cuyos, ang biktima mao pay pagkahuman og duwa niadtong tungura.

Samtang siyang naglingkod sa daplin sa dalan kalit nga miduol ang mamununo ug nangutana kun siya ba si Arnold, ug dihang mitubag ang biktima siya ang maong tawo kalit nga mibunot ang maong lalaki og armas dayong pusil kaniya makadaghang higayon.

Ang biktima nakahigayon sa pagdagan bisan paman sa mga igo sa bala ug nakasakay og usa ka traysikad ug nagpahatud sa Cebu City Medical Center ug padayong giatiman karon sa mga doktor.

Sumala pa sa imbestigasyon nga niadtong milabay’ng semana nakakita og away si Fernandez sa usa ka ginganlan niini og Gerry, wala hinuon pa matumbok sa kapolisan kun may koneksyon ba kini sa pagpamusil kaniya sa milabay’ng gabii. - Edwin Ian Melecio (BANAT NEWS)