4 ka balay sa Talisay gipanglarot sa City Hall

CEBU, Philippines - Upat ka balay sa sitio Pang-pang, barangay San Isidro, dakbayan sa Talisay ang gilarot sa demolition team sa kagamhanan sa dakbayan kagahapon sa buntag.

Ang mga tag-iya sa balay nga gipangguba mao sila si Bobby Tablega, Genevieve Sarita, magkapuyo nga Joan Sarita ug Rene Sabagat ug magkapuyo nga Jaqueline Tablega ug Warlito Quize.

Si Mayet Abarquez sa City Hall sa Talisay nga nahinabi sa Banat News nagkanayon nga 65 lang ka tawo ang benepisyaryo sa Villa Santa Cruz Homeowners Association (VSCHA) apan ang upat nga gilarotan sa balay dili sa asosasyon ug giingong nangangkon nga mga iredero sa tag-iya sa luna nga giugmad

Ang maong luna nga may gilapdong kapin sa 3,000 ka metro kuwadrado napalit sa siyudad niadtong tuig 2004 gikan sa pamilyang Llenes.

Matud ni Abarquez nga subay sa ilang pakisusi, ang pamilyang Llenes maoy gibaligyaan kaniadto sa nahisgutang luna sa apohan sa mga nangangkong iredero.

Ang mga pamilyang gilarotan og mga balay kanunay nang gipadad-an og notice to vacate gikan sa city legal officer sa siyudad aron sila makapangandam.

Niadtong tuig 2008 ang nahisgutang luna naugmad ug ang World Bank maoy mihatag og pundo sa paghinlo niini.

Ang matag benepisyaryo gigahinan og tag 35 metro kuwadrado nga datahan nila og tag kapin P400 matag buwan sulod sa 25 ka tuig.

Si Abarquez midugang nga walay nahitabong kagubot kagahapon dihang giguba ang upat ka balay kay gibantayan kini sa kapolisan . – BANAT NEWS