Dizon mitapon kang Cortes, Cabahug nakatilaw og 'bugnaw' nga pagtagad

CEBU, Philippines – Gitahan ni Konsehal Emmarie Ouano Dizon ang chairmanship sa minority block sa konseho sa dakbayan sa Mandaue ug mitipon sa mayoriya.

Mipadayag si Dizon nga iyahang suportahan ang mga programa sa administrasyon maong dili na siya mahimong mangulo sa minoriya.

Dako ang pagtuo ni Dizon nga ang kalamboan sa dakbayan matagamtaman lang kun magkahiusa ang tanang opisyal nga gipangulohan ni Mayor Jonas Cortes.

Si Dizon ug Konsehal Editha Cabahug mao ray sakop sa oposisyon nga nakadaog sa nakalabay'ng piniliay ug karong si Dizon mitapon na sa administrasyon magbinugtong nalang sa minoriya si Cabahug.

Ang minoriya maoy gipaabot nga mosaway sa mga polisiya o mga lakang nga buhaton sa administrasyon kun sa ilang tan-aw agrabyado niini ang katawhan.

Sa report sa The Freeman, sa milabay'ng sesyon niadtong Miyerkules, nabatyagan ni Cabahug ang 'bugnaw' nga pagtagad sa iyang mga kaubanan sa iyang mga resolusyon gumikan kay bisan usa niini wala uyoni sa iyang mga kaubanan sa konseho.

Lakip sa mga resolusyon ni Cabahug nga wala tagda sa iyang mayoriya mao ang ordinansa aron tukoron ang usa ka Inter-Agency Council Against Trafficking in the City nga tuyo mao ang proteksyon sa kababayen-an ug kabataan gikan sa prostitusyon.

Bisan sa kawalay pagtagad sa mga kaubanan sa nauna niyang resolusyon, gipadayon gihapon ni Cabahug sa iyang sunod nga mga resolusyon sama sa katukoran ug buwag nga legislative building, implementasyon sa katukoran sa holding facility sa mga malapasong kabataan ug ang instalasyon sa intersection traffic ug uban pang safety measures sa C. Ouano Avenue, sa gihapon walay bisan usa nga miisa sa ilang tingog aron paluyohan kini.

Tungod kay walay bisan usa nga miisa og kamot alang sa pag-uyon sa mga resolusyong buot ipalabang ni Cabahug gipahibalo ni Bise Mayor Glenn Bercede nga 'deemed killed' kon 'patay na' ang maong mga resolusyon.

Si Cabahug miapelar sa iyang mga kaubanan nga kalimtan na ang aligutgot sa miaging kampanya ug piniliay ug nanghinaot nga buhaton ug tumanon sa iyang mga kaubanan ang ilang gipanaad sa mga taga Mandaue ug dili ang padayong pamolitika. (BANAT NEWS)