May deperensya sa pangisip gi-rape

CEBU, Philippines - Nagtingkagol sa Balamban detention cell ang usa ka 36-anyos nga ulitawo human kini pasanginling milugos sa 19-anyos nga dalagang giingong may deperensya sa pangisip niadtong Huwebes sa buntag diha sa usa ka barangay sa lungsod sa Balamban.

Ang biktima (pangalan gipugngan sa Banat News) kuyog sa iyang mga ginikanan mitaho ngadto sa kapolisan kabahin sa maong hitabo ug mipasangil batok kang Englis Napoles nga maoy milugos kaniya.

Si SPO3 Arvie Banate mibutyag nga gikan mipalit sa tindahan diha sa ilang lugar ang dalaga ug naglakaw na pauli dihang kalit lang mitungha si Napoles.

Ang biktima mibutyag nga gidala siya niini ngadto sa hilit nga dapit ug pag-abot didto gilugos siya niini.

Matud ni Banate nga sa unang pagtaho sa biktima diha sa ilang buhatan ang sumbong niini mao nga “acts of lasciviousness” o gipanghikap lang ang pribado niyang lawas sa suspetsado.

Tungod sa maong pasangil giimbitar sa mga polis si Napoles ug gipaubos sa imbestigasyon ,apan human mapaubos sa medical examination diha sa Balamban District Hospital nasutang nalugos gyud kini.

Matud usab ni Banate nga dihang gipangutana ang biktima sa tinuod nga hitabo magsige lang kini og lingo-lingo sa iyang ulo.

Si Napoles mag-atubang og kasong pagpanglugos nga gikatakdang ipasaka ngadto sa korte. (Brenda Batuto ug Mellanie Rosales sa The Freeman)  (BANAT NEWS)