16-anyos patay human gipusil makadaghang higayon

CEBU, Philippines - Patay ang usa ka 16-anyos nga lalaki human kini gipusil makadaghang higayon diha sa sudlonong bahin sa sitio Fatima sa barangay Basak-Pardo ning dakbayan kagahapon sa kaadlawon.

Giila ang namatay mao si Nelmard Gabuya, residente sa barangay Cogon-Pardo samtang wala pay matumbok nga mamumuno ang kapolisan atol ning pagsulat sa balita.

Sumala pa ni PO1 Nilo Adventurado sa Homicide Section sa pakighinabi sa Banat News, nakadungog na lang og buto-buto sa armas ang mga residente sa maong lugar.

Dihang ilang gisusi, nakita nila ang biktima nga nagbuy-od sa agianan.

Ang grupo ni SPO4 Alex Dacua uban sa mga sakop sa Crime Scene Investigation Unit sa Cebu City Police Office nakakaplag og walo ka basiyo sa kalibre .380 nga bala ug duha ka basiyo sa kalibre .45 nga bala.

Ang biktima nakaangkon og mga samad pinusilan sa nagkadaiyang parte sa iyang kalawasan nga gituohang maoy nakaingon sa hinanali niining kamatayon.

Ang kapolisan wala pay matumbok nga motibo sa maong krimen ug sa katuyoan sa biktima nganong naabot kini sa maong dapit.

Sa laing bahin, usa ka drayber sa habal-habal nga si Leoncio Ortiz,42, nga taga sitio Sirao Proper sa barangay Sirao ning dakbayan ang napusilan sa iyang walang siko human gipusil sa laing drayber sa habal-habal.

Sumala pang Adventurado base sa imbestigasyon nila ni Dacua, mao pay pag-parked sa biktima sa iyang motorsiklo diha sa atubangang bahin sa JY Square sa barangay Lahug dihang miabot ang suspek nga nailhan lang sa pangalang ‘Kadre’ ug laing wala mailhing lalaki luwan sa motorsiklo.

Gikatahong aduna nay karaang panagbangi ang duha ug dihang nakit-an ang biktima gipusil kini dayon ug mipaturatoy og padagan palayo subay sa Salinas Drive.  – BANAT NEWS