Cerge nagbilin P12-milyones para sa iyang scholars

CEBU, Philippines - Dili mominos 200 ka mga scholars sa kolehiyo ubos sa lainlaing kurso ang gibilin sa mitaliwan nga Sugboanong Press Secretary Cerge Remonde. Ang maong mga scholars nagtungha sa Cebu Technological University (kanhi Cebu State College of Science and Technology) Argao Campus.

Si Dr. Juanita Pinote, Director for Students Services Division sa CTU-Argao sa dihang nahinabi sa Banat News nagkanayon nga ang mga scholar nagsugod kini sa school year 2008-2009 ug anaa na kini karon sa second year ubos sa lainlaing kurso sama sa Agriculture, Education, Information Technology, Forestry ug Hospitality Management.

Gipasalig hinuon ni Dr. Pinote nga dili maapektuhan ang maong mga scholar tungod kay gi-deposito nang daan ang P12 milyones nga gahin niini ubos sa PGMA Cerge Remonde Scholarship Program gikan sa pagsugod hangtod na sa pagtapos sa maong mga tinun-an.

Matud ni Pinote nga apil na sa maong gahin ang allowance ug budget sa mga scholars sa ilang pletehan ug palitonon nga mga project diin 80 porsiyento sa mga tinun-an ubos sa kursong Agriculture.

Gipadayag ni Pinote nga apektado sila ug naguol sa dihang nabati ang balita sa pagtaliwan ni Remonde. Si Remonde lumad nga taga barangay Lamakan, Argao.

Hinuon gitakdang mopahigayon og bihilya ang mga scholars ni Remonde uban sa mga magtutudlo sa CTU Argao Campus atol sa pag-abot unya sa patay’ng lawas niini didto sa Argao karong Sabado aron adto hayaon sa Diosdado Macapagal Gymnasium sa maong lungsod nga maoy iyang proyekto ug pagka-Domingo sa alas 3 sa hapon ang iyang lubong. – BANAT NEWS