'Drug suspects' gi-absuwelto sa korte kay huyang ang mga ebidensya

CEBU, Philippines - Giabsuwelto sa korte ang upat ka gidudahang drug suspects dinhi sa siyudad sa Sugbu human mapakyas ang kapolisan sa paghipus og tarong sa mga ebidensiya. Unang giabsuwelto ni RTC-7 Branch 8 Judge Macaundas Hadjirasul sa kasong kalapasan sa Section 11, Article II of Republic Act 9165 kon Dangerous Drugs Act, mao si Bonifacio Jabonero, hingkod ug lumad nga taga siyudad sa Sugbu. Si Jabonero nakuhaan sa kapolisan og upat ka liniket nga marijuana atol sa ronda nga gihimo sa kapolisan niadtong Abril 23, 2009.

Apan si Judge Hadjirasul nagkanayon nga nagduda ang korte sa kamatinud-anon sa ebidensiya nga gipresentar sa kapolisan ngadto sa korte tungod kay lahi ang nakuha nga marijuana ug ang na-examine sa PNP Crime Laboratory.

 Laing naabsuwelto sa susamang kaso mao sila si Rodrigo Isno Habagad, Jr. ug Gregory Monacillo Saniel kinsa nakuhaan sa kapolisan og mga drug paraphernalia niadtong Nobiyembre 2, 2007.

 Si Judge Hadjirasul nagkanayon nga sa iyang disisyon nga wala siya'y nakitang igong ebidensiya nga susama sa mga ebidensiya nga nakuha sa kapolisan atol sa gipahigayong police operation tungod sa managlahi nga marking sa kapolisan ug sa PNP Crime Laboratory. Laing naabswelto mao ang usa ka Bartolome Eco kinsa nakuhaan og usa ka pakite nga shabu niadtong Marso 16, 2009. Apan tungod sa walay klarong mga marking sa mga ebidensya ang kapolisan nga gipresentar sa korte, si Judge Hadjirasul nagduda nga posibling gitamper ang ebidensiya o kaha dili mao ang gipresentar nga ebidensiya sa korte. - BANAT NEWS