Lalakeng naghuwat sa ig-agaw gipusil namatay

CEBU, Philippines - Patay ang usa ka lalaki human gipusil samtang nagbarog daplin sa dalan kilid sa tindahan nga nagpaabot sa iyang mga ig-agaw sa sitio Panagsama barangay Basdiot lungsod sa Moalboal niadtong Miyerkules sa alas 8:30 sa gabii.

Ang biktima mao si Philip Ursal Santos, 28, drayber sa habalhabal ug molupyo sa nahisgutang lugar samtang pabiling wala mailhi ang mamumuno niini.

Matud pa ni PO1 Camelo Zapra sa Moalboal Police Station dihang nahinabi sa Banat News gikan nga mipalit og candy sa tindahan si Santos ug nagpaabot sa iyang ig-agaw.

Apan kalit lang miduol ang wala mailhing lalaki ug walay daghang pangutana gidiretso og pusil ang biktima sa ulo, ang biktima namatay diha-diha samtang ang mamumuno daling nakaikyas.

Ang kapulisan padayon pa sa ilang manhunt operation pag-ila ug pagsikop sa kriminal ug pagtino sa motibo sa krimen. – BANAT NEWS