Patay'ng lalaki nakuha sa mananagat

CEBU, Philippines - Usa ka patay’ng lawas sa wala mailhing lalaki ang nakaplagan sa usa ka mananagat nga naglutaw sa kadagatan sa barangay Kapital Cillo lungsod sa Bogo niadtong milbay'ng buntag.

Si SPO3 Rolando Torquedo sa Bogo Police Station nagkanayon nga ang mananagat nga si Berting Obial, taga barangay Nailon maoy nagkabangal sa maong patay'ng lawas. Matud pa ni SPO3 Torquedo nakit-an ni Obial ang patay'ng lawas samtang nanagat hinungdan nga gikuha niya kini ug gi-report sa kapulisan.

Ang maong patay’ng lawas gibana-banang 5”2 ngadto sa 5”3 ang gitas-on, adunay tattoo nga krus sa iyang tuong abaga, nagsul-ob og maroon nga sleeveless ug itom nga underwear.

Si SPO3 Torquedo, nagkanayon nga ang maong patay'ng lalaki gipalubong gilayon sa ilang municipal health officer human gikatahong nagsugod na sa pagkadugta.

Gituuhan sa kapulisan nga posibleng nalumos ang maong biktima ug naanod lang kini sa sulog sa tubig sa dagat gikan sa mga silinganang lugar. – BANAT NEWS