Sakop sa CCDRRMO nga napaubos sa training angayan i-renew  

CEBU, Philippines — Uyon si Cebu City Mayor Nestor Archival Sr. sa resolusyon ni Konsehal Pastor “Jun” Alcover nga awtomatiko nga ma-renew ang kontrata sa sakop sa Cebu City Disaster Risk Reduction and Management Office nga nakapaubos na og disaster-related training diin kasagaran niini mga casual ug job order employees.

Apan giklaro ni Archival nga tun-an ang maong resolusyon kun ugaling makapasar kini sa konseho tungod kay una niya nga giingon nga tan-awn pa ang panudlanan sa kagamhanan kung igo ba nga makasweldo sa mga empleyado.

Ang pangu sa Human Resource Development Office nga si Henry Tomalabcad miingon nga 50% lang sa mga kaswal nga empleyado ang wala pa ma-renew ang ilang kontrata.

Bisan pa man sa gipatuman ni Archival nga “No Appointment, No Work” policy, nisumiter gihapon si Comar og listahan sa mga kwalipikado apan wala na-renew nga mga kawani ngadto kang Archival human kini nipadayag og kabalaka sa pagkahuyang sa kapasidad sa operasyon sa pagtubag sa kalamidad.

Sa laing bahin aprobado na sa unang pagbasa ang paghimo sa Provincial Disaster Risk Reduction and Management Office (PDRRMO) nga independente nga departamento sa Probinsya sa Sugbo.

Ang provincial board miaprobar sa first reading sa ordinansahon nga giduso ni Association of Barangay Council (ABC) President ug ex-officio board member Celestino "Tining" Martinez atol sa regular session kagahapong adlawa, Hulyo 21.

Si Martinez nagkanayon nga angayan ra nga mahimong usa ka departamento ang PDRRMO tungod sa kadaghang katalagman nga masinati sa Sugbo

Matud ni Dennis Pastor ang hepe sa PDRRMO sa pagkakaron tulo ra ang responders sa ilang buhatan.

Ang PDRRMO sa panahon ni kanhi gobernador Hilario Davide III nahimo kini nga usa ka departamento, apan sa panahon ni kanhi gobernador Gwendolyn Garcia nabalik kini isip division ubos sa buhatan sa gobernador. (BANAT NEWS)