2,400 ka casual ang na-renew

CEBU, Philippines — Gibutyag ni Henry Tomalabcad pangulo sa Human Resource Development Office sa Kagamhanan sa Dakbayan sa Sugbo nga anaa sa 2,400 ka mga casual employees nga kasamtangang na-renew diin ang basehan sa unang hugna sa re-appointment mao ang kritikal nga serbisyo lamang sama sa kahimsog, sanitasyon, ug pag-atiman sa bata. Ubos sa administrasyon ni kanhi mayor Raymond Alvin Garcia anaa sa 2,962 ang casual employees ug 2,668 ang mga job order employees. Suma ni Tomalabcad nga sa pagpatuman ni Mayor Nestor Archival Sr. sa “No Appointment, No Work” policy, wala pa gihapoy job order employees ang na-endorso sa ilang buhatan gumikan kay naghuwat pa sila og mga manpower request gikan sa mga department heads ug sa mga project proposals nga pirmahan ni Archival.

 “As of July 22, so far wala pay nakaabot sa amo. Probably there are some nga nakapapirma na but so far wa pay nadawat nga endorsement sa HRDO”, segun ni Tomalabcad. Giklaro ni Tomalabcad nga walay mga bag-ong empleyado ang kagamhanan nga gi-endorso gikan sa mga department heads ug bugtong ang mayor lang ang adunay gahum sa pagpasulod og bag-ong empleyado.

Sa pagkakaron, padayon gihapon ang HRDO sa ebalwasyon sa mga empleyado sa City Hall aron makatabang kini sa pagpadayon sa mga serbisyo sa kagamhanan. MEL BANAT NEWS