RTWPB nihimo og konsultasyon sa umento sa sweldo

CEBU, Philippines — Nihimo ang Regional Tripartite Wages and Productivity Board VII (RTWPB-VII) og public consultation aron makuha ang mga inputs sa stakeholders sa paghimo og patas ug balanse nga desisyon sa pag-adjust sa minimum wage sa Central Visayas. Ang konsultasyon gitambongan sa dul-an sa 60 ka mga partisipante, lakip ang mga lider sa pamuo, mga representante sa business group, ug mga opisyal sa gobyerno.

Si DOLE Regional Director ug RTWPB-VII Chairperson Atty. Roy L. Buenafe miingon nga importante ang konsultasyon aron masabtan ang sentimento sa stakeholder ug magiyahan ang proseso sa deliberasyon sa board. Si Labor Sector Representative Antonio Cuizon misuporta sa inisyatiba, nga nagpasiugda sa kabililhon sa pagpaminaw sa mga trabahante ug mga employer, samtang si Management Sector Representative Dr. Philip Tan nihatag og gibug-aton nga ang wage policy kinahanglang magpakita sa tinuod nga kahimtang sa ekonomiya ug ikonsiderar ang mga tingog niadtong labing apektado.

Atol sa dayalogo, siyam ka mga lider sa mamumuo ang mipadayag sa ilang hugot nga hangyo sa igo nga usbaw aron makab-ot ang gitawag nga "living wage," isip kompensasyon sa pagsaka sa presyo sa mga nag-unang palaliton. Samtang, lima ka representante sa business sector ang nipadayag og kabalaka nga ang dakong pagtaas sa suholan, sama sa gisugyot kaniadto nga P200 mahimong makadaot sa lokal nga ekonomiya, makapugong sa mga tigpamuhunan, ug mosangpot sa job loss.

Subay niini, aron mas masabtan ug mapalig-on ang diskusyon, gipresentar ni Philippine Statistics Authority OIC-Regional Director Wilma Perante ang datos gikan sa Labor Force Survey, samtang gihisgutan usab ni Board Secretary Atty. Evita G. Mendoza-Balane ang kasamtangang minimum wage rates sa lain-laing rehiyon isip basihan sa posibleng pagtaas sa suholan. (BANAT NEWS)