Wanted persons, nakapusil og PWD sikop

CEBU, Philippines — Duha ka top 1 most wanted person sa Dakbayan sa Talisay ug Lungsod sa Minglanilla ang nadakpan.

Unang nasikop mao si alyas “Bradex” diha sa Purok Katambak, Barangay Tungkop, Lungsod sa Minglanilla niadtong Biyernes sa alas 8:00 sa gabii.

Gikataho nga si Bradex ang top 1 most wanted sa municipal level ug top 4 most wanted sa provincial ug regional level.

Ang suspetsado adunay kasong rape diin nalutsan kini og warrant of arrest.

Si Police Major Areiza Otida, hepe sa kapolisan sa Lungsod sa Minglanilla nagkanayon nga anaa sa ilang kustodiya ang suspetsado.

Samtang usa ka top 1 nga most wanted sa municipal level ang nadakpan sa kapolisan sa Dakbayan sa Talisay diha sa Purok Bayabas, Barangay Lawaan 3 niadtong Sabado sa hapon.

Si alyas “Junlix”, 25-anyos ang nag-atubang og kasong ilegal nga paghupot og armas.

Ang kapolisan padayon sa pagsunod sa mga tawo nga gipangita sa balaod.

Sa laing bahin, nasikop sa kapolisan ang usa ka tawo nga suspetsado sa pagpamusil sa person with disability (PWD) diha sa Sitio Pomelo,  Barangay Jubay, Lungsod  sa Liloan  niadtong Sabado sa gabii.

Si Police Executive Master Sergeant Jayson Gayo sa Liloan Police Station niila sa biktima nga si Edwin Bughao, hingkod ang panuigon, nagpuyo sa maong dapit.

Dali nga gidala sa iyang mga sakop sa pamilya ang biktima ngadto sa Eversly Child Sanitarium and General Hospital sa Barangay Jaobiao, sa Siyudad sa Mandaue ug padayon pa kining giatiman sa mga doktor sa maong tamblanan.

Samtang ang  suspetsado  giila usab sa kapolisan nga mao sila si Marjon Canete alyas "Kulafu,"  31,  ulitawo ug giingong higala sa  biktima, nagpuyo sa Purok Adelfa, Sitio Fatima Barangay Jubay sa nahisgotang lungsod.

Matud ni Gayo nga giingong kauban ni Kulafu ang laing suspetsado sa maong pagpamusil nga giilang si Wendel  Tabla, hingkod usab ang panuigon nga nagpuyo sa maong dapit ug padayon pa nga gipangita sa kapolisan.

Base imbestigasyon sa kapolisan nasayran nga ang biktima ug si Kulafu nagkalalis kini sa wala mahibaw-i nga hinungdan nga niresulta sa pagpamusil.

Human sa maong pagpamusil dali nga nisibat pahilayo sa lugar si Kulafu kauban sa laing suspetsado apan sa follow-up operation sa kapolisan ilang nadakpan si Kulafu dihang nasugatan kini sa mga polis sa pagsulay unta niini og sibat Ang laing kauban ni Kulafu kinsa gituohang didto moagi sa laing lugar sa pagsibat ang padayon pa karong gipangita  sa kapolisan. (BANAT NEWS)