Eversely Hospital gihatagan og mga kahimanan ni Ruiz

CEBU, Philippines - Gitugyan niadtong Huwebes ang dugang kahimanan alang sa Eversely Child Sanitarium Hospital sa barangay Jagobiao, dakbayan sa Mandaue nga gidonar   sa Philippines Inland and Island Mission ug Fruitful Harvest Mission.

Ang pagtugyan gihimo pinaagi sa usa ka seremonyas sa formal turn over nga gitambongan sa kadagkoan ug mga kawani sa maong tambalanan uban ni 6th District Representative Nerissa Soon-Ruiz ug ni Undersecretary   Lito Ruiz sa Department of Interior and Local Government.

Ang field director sa Fruitful Harvest Mission nga si Pastor Nolan Diaz sa iyang pamahayag miingon nga ilang gibati ang kahinangop kay ang dugay na nilang gitinguha nga paghatag og donasyon alang sa maong tambalanan hingpit nang natuman karon.

Gipasabot niya nga si Usec. Ruiz maoy ilang nahimong kahimanan aron makahatag sila og mga kasangkapan sa maong tambalanan .

Naglakip sa dugang ekipo nga nadawat sa maong tambalanan mao ang 426 ka mga karton nga second hand medicaldental supplies, 67 ka mga hospital beds, ug uban pa.

Ang Chief of Sanitarium III nga si Dr. Primo Joel Alvez   mipadayag sa iyang pagpasalamat ug mipahibalo nga sa kasamtangan maoy ilang pangindahay nga ang Evesely Child Sanitarium Hospital mahimo na nga medical center sa umaabot nga panahon.

Si Kongresista Soon-Ruiz kinsa mipadayag usab sa iyang pangindahay nga ang maong tambalanan hingpit nang ikatugyan sa nasudnong kagamhanan ngadto sa local nga kagamhanan sa Mandaue aron makasilbi kini sa tanang masakiton sa amihanang bahin sa lalawigan. (Romeo T. Limpangog)   (BANAT NEWS)