Lola namatay kay habal-habal nadasmag

CEBU, Philippines - Patay ang usa ka 73-anyos nga lola nga pasahero ug naangol usab ang drayber sa habal-habal nga iyang gisakyan sa dihang aksidenting mibangga   sa gipatongpatong nga mga sako nga puno sa mga balas daplin sa highway didto sa barangay Montañeza, lungsod sa Malabuyoc niadtong Biyernes sa alas 5:30 sa hapon.

Ang namatay mao si Dionisia Redonggo, 73, minyo ug molupyo sa Sitio Parale, barangay Sorsogon samtang ang naangol   mao si Edgar Buddy Lebosada, 39, usa ka mag-uuma ug molupyo sa nahisgutang lugar.

Matud ni PO1 Camelo Zapra sa Malabuyoc Police Station sa dihang nahinabi sa Banat News subay sa blotter nga gibasehan niini ang maong habal-habal drayber gipakyaw ni Redonggo gikan sa lungsod sa Alegria paingon unta sa Poblacion, Malabuyoc.

Apan paghiabot nila sa maong lugar ug tungod sa kusog nga pagpadagan wala makabantay ang drayber sa gitumpi nga mga sinako nga dunay sulod nga mga balas daplin sa karsada ug didto kini madasmag ug niresulta sa pagkatumba sa motor ug pagkalabay sa 73-anyos nga lola kinsa napantok ang ulo ug lawas niini sa semento nga karsada ingon man ang drayber nga nakaangkon og pangos sa iyang bukton ug mga tiil.

Gidali sa pagtabang sa mga tawo sa maong lugar ang tigulang ug gidala dayon kini sa Malabuyoc District Hospital apan tungod kay 50/50 na ang kahimtang niini gipaderetso dayon kini sa tambalanan dinhi sa dakbayan sa Sugbo apan namatay   diha pa lang sa dalan. - BANAT NEWS