Padulong sa haya sa higalang naaksidente, naaksidente sad patay

CEBU, Philippines - Kamatayon ang gidangatan sa usa ka drayber samtang naangol usabh ang angkas niini samtang silang duha padulong untang motambong og haya sa patay niadtong Biyernes sa gabii diha sa barangay Taloot sa lungsod sa Argao.

Nabagnos ang ulo sa sementadong dalan ug namatay ang drayber sa motorsiklong si Andy Mark Fuentes, 23, samtang talandugon ang angkas niining si Junjun Salarde, 24, pulos molupyo sa nahisgutang lugar.

Matud pa ni P01 Renato Nacaytona sa Argao Police dihang nahinabi sa Banat News nga padulong ang duha sa haya sa ilang higalang namatay usab sa aksidente diha sa sitio tawos barangay Taloot.

Apan paghiabot nila sa nahisgutang lugar kalit lang nawad-an og preno ang motorsiklo ug mibangga sa mga stalls daplin sa karsada hinungdan nga nangalabay sila.

Ang ulo sa duha gikatahong pulos nangalamba ug wala na makabarog pa hinungdan nga gitabang nalang kini sa mga molupyo ug gidala sa Isidro Kintanar Memorial Hospital apan gideklarar nga dead on arrival si Fuentes samtang si Salarde gilahos sa Vicente Sotto Memorial Medical Center (VSMMC) tungod sa talandugong kahimtang.

Matud pa ni P01 Nacaytona nga pulos nakaangkon og dagkung samad sa ulo ang duruha nga pulos wala magsul-ob og helmet.

Gihulagway usab sa kapulisan nga accident prone area ang maong lugar nga nahitabuan. - Darrel Carumba (BANAT NEWS)