Negosyante giunay og patay sa trabahador

Cebu - Patay ang usa ka negosyante sa bukirang bahin sa barangay Mataba siyudad sa Danao human kini unaya sa iyang trabahante ug gipusil makadaghang higayun hangtod nga namatay kagahapon sa alas 8:00 pasado sa buntag.

Ang biktima mao si Artemio Sabaric Sr., 55, nagpuyo sa dalan highway sa barangay Looc sakop sa nahisgutang siyudad samtang ang suspek mao si Gerry Bariga, 37, nagpuyo sa maong lugar ug giingong ilegal nga manghimoay sad og paltik nga mga armas.

Gikatahong nagkabingkil ang biktima ug suspetsado human wala na makabayad sa puhonan ang suspek dihang gipaningil sa biktima tungod sa pangatarungang magsige og kuha og mga armas ang anak sa biktima nga si Artemio Sarabic, Jr. nga walay bayad-bayad.

Kini maoy sinugdanan sa ilang panagbingkil ug atol sa ilang panagkita kagahapong adlawa nisampot kini sa pagpamusil sa suspek ngadto sa biktima.

Ang biktima nakaangkon og daghang samad pinusilan sa ibabaw nga bahin sa walang mata, bukobuko, hawak ug tuong kamot hinungdan sa hinanali niining kamatayon.

Gikunpirmar ni SPO3 Quirino Vasquez sa Danao City Police dihang nahinabi sa Banat News nga panagbangi sa negosyo ang motibo sa krimen.

Ang suspek nisibat human sa hitabo apan matud ni SPO3 Vasquez nagpahibawo na ang mga kabanay niini nga boluntaryong motahan sa paghimo ning balita kagahapon. – BANAT NEWS