50 ektarya sa SRP i-award na sa Filinvest karong adlawa

Cebu - Gitakda nang i-award karong adlawa sa Joint Venture Selection Committee (JVSC) ang 50 ka ektaryang luna sa South Road Properties (SRP) ngadto sa Filinvest Land Incorporated.

Kini human ibasura ni acting mayor Michael Rama ang gipadalang appeal sa kagamhanang probinsyal pagbasura sa JVSC sa motion for reconsideration niini.

Una nang gibasura sa JVSC ang eligibility requirement sa Kapitolyo pagpuhal sa proposal sa Filinvest pagpalit ug pagpakig-joint venture sa siyudad diha sa SRP.

Alang sa JVSC, wala makatuman sa nalatid sa Joint Venture Ordinance sa siyudad sa Sugbu ang Kapitolyo hinungdan nga gisalindot niini ang tinguha sa kagamhanang probinsyal.

Miduso og motion for reconsideration ang provincial government sa desisyon sa JVSC apan gibarugan sa komitiba ang pagbasura niini sa eligibility requirement sa Kapitolyo.

Tungod sa maong kalamboan daling niapelar niadtong miaging adlaw ang kagamhanang probinsyal ngadto kang Rama apan sa gihapon napakyas ang Kapitolyo pagsaysay sa mga rason nga makakombinsir sa acting mayor pagbali sa nahaunang mga desisyon nga nakab-ot sa JVSC.

Tungod niini, gibasura ni Rama ang “letter of appeal” nga gipadala ni Adolfo Quiroga, ang Cebu Provincial Planning and Development Officer, ngadto kaniya.

“I have gone over your appeal for reconsideration as well as its supporting documents and found nothing therein that would warrant a reversal of the Joint Venture Selection Committee’s decision. I concur fully with the committee’s decision and, therefore, affirm it,” ang tipik sa tubag ni Rama sa letter of appeal sa Kapitolyo.

Tungod niini, wala nay nakitang babag ang chairman sa JVSC nga si City Administrator Francisco Fernandez pag-award sa 50 ka ektaryang luna sa SRP ngadto sa Filinvest.

Karong adlawa gitakdang magtigom ang mga sakop sa JVSC uban sa mga representante sa Filinvest alang sa maong lakang.

Human unya niini ipadala dayon sa JVSC ang request ngadto sa konseho sa dakbayan alang sa paghatag og pagtugot kang Rama pagpirma og kontrata tali sa Filinvest.

Apan ang Kapitolyo naglaraw sa pagdangop sa korte pinaagi sa pagpasaka og kaso sa mga opisyales sa Cebu City government lakip na ang mga sakop sa JVSC.

Sumala pa ni Capitol Consultant on information, Rory Sepulveda nga hagbay ra nilang napangandaman ang legal nga lakang, wala sad siya mosanong dihang gipangutana sa mga sakop sa media kun mangayo sila og Temporary Restraining Order (TRO) ngadto sa korte, nga kun mahinayon hayan mosamot kalangay og award sa City Hall ang luna ngadto sa Filinvest hangtud nga di makadesisyon ang korte.

“Go on, they can award it, just like what they did in the texters choice award,” pangomedya pa ni Sepulveda nga ang gipasabot mao ang kontrobersyal nga ‘sipyat’ sa Miss Cebu 2009 sa Globe Texters Choice. – BANAT NEWS