Mga pari sa Birhen sa Regla pabilin nga nagpakahilom

CEBU - Pabiling nagpakahilom ang mga pari sa Birhen sa Regla National Shrine sa dakbayan sa Lapulapu nga gipetisyonan tungod sa pasangil sa mga parokyano nga pagpangurakot.

Si Rev. Fr. Roberto “Bob” Villanueva, usa sa mga pari nga giakusahan sa mga parokyano nagkanayon nga ang Missionaries of the Sacred Heart (MSC) ubos sa pagdumala sa ilang Cebu District Superior nga si Rev. Fr. Agustin Pulong ug Rev. Fr. Tito Maratas nga Provincial Superior, mimando kanila sa dili una paghatag og tubag ug bisan unsang komento sa mga alegasyon.

Si Fr. Villanueva nagkanayon nga plano sa mga opisyal sa MSC nga makigkita una ni Cardinal Vidal alang sa kasulbaran sa maong suliran.

Ang Mother Butler Missionary Guild (MBMG) mialegar nga anomaloso ang pagdumala sa mga pari sa nahisgutang shrine. Misulat sila og petisyon nga gipadangat ngadto kang Arsobispo Ricardo Cardinal Vidal.

Gipetisyonan sa maong grupo ang kura paroko sa Parokya sa Birhen sa Regla nga si Rev. Fr. Pedro “Pete” Arguillas, uban nilang Fr. Villanueva ug Rev. Fr. Fabian Cayetano.

Mipirma sa petisyon batok sa tulo ka pari ang 1,126 ka mga parokyano sa dakbayan sa Lapulapu.

Samtang si Vitaliano Fortich, presidente sa Parish Pastoral Council sa parokya sa Birhen sa Regla nagmalaomon nga masulbad ra ang maong problema.

Giklaro ni Fortich nga ang petisyon pagpatangtang sa tulo ka misyonerong pari bunga lamang sa personal nga interes.

Matud ni Fortich nga gigamit lamang sa usa ka grupo ang ngalan sa MBMG pagpalagpot sa tulo ka pari. Apan ang MBMG mihimakak nga misang-at sila og petisyon ngadto kang Cardinal Vidal batok sa tulo ka pari.

Si Fortich nagkanayon nga andam silang molusad og dialogo tali sa mga pari ug sa mga parokyano aron maplantsa ang maong kagubot. (Bong Soriano) (BANAT NEWS)