Nag-sex gawas simbahan gisilotan na's korte

CEBU - Mi-plead guilty kagahapon sa buntag sa gipahigayong arraignment diha sa sala ni Judge Mario Manayon sa Municipal Trial Court in Cities (MTCC) sa dakbayan sa Talisay ang manag-uyab kinsa nasakpang naghilawas diha sa compound sa Santa Teresa de Avila Parish sa barangay Poblacion, dakbayan sa Talisay niadtong Oktobre 23, 2008 sa udto.

Si Cornelio Samson, 42-anyos taga sitio Sawsawan, barangay San Roque ug ang uyab niining si Azucena Embornas, 38, taga sitio Uldog, barangay Poblacion sa maong dakbayan ang gipasakaan og kasong grave scandal nila ni Rodolfo Mabala ug Ricardo Quijano, mga tanod sa barangay Poblacion kinsa maoy misikop sa maong manag-uyab tungod sa ilang gibuhat.

Si Samson ug Embornas ang nagtingkagol sa Talisay City Jail sulod sa usa ka buwan ug sa pag-atubang nila kagahapon sa sala ni Manayon miangkon sila nga nakabuhat og kalapasan.

Si Manayon mihukom sa duha nga mabilanggo sulod sa duha ka buwan isip silot sa ilang nahimong kalapasan.

Kahinumduman nga si Samson ug Embornas kinsa parehong hubog niadtong higayona ang nagtabon lang og habol dihang naghilawas nga nakapatawag sa atensiyon sa mga nangagi ilabi na sa mga estudyanteng paingong namauli gikan sa klase aron maniudto.

Ang duha ang wala manumbaling bisan gialirongan na sa mga tawo nga mitan-aw sa ilang gibuhat.

 Ang nahisgutang duha ka tanod ang paingon usab untang mopauli aron maniudto apan gitawag sa mga nakasaksi ug gisumbong ang gihimo sa duha.

Si Mabala ug Quijano ang daling miresponde sa maong taho ug naabtan pa nila ang duha nga walay hamong-hamong sa ubos nga bahin sa ilang lawas ug dihang gisita arogante pa kaayong nanubag.

Ang duha gidala nila ni Mabala ug Quijano diha sa Talisay City Police Station tungod sa maong hitabo ug dihang giimbestigar parehong mihimakak sa pasangil apan kagahapon miangkon na sila sa kalapasan. – BANAT NEWS