12 sakong marijuana nalarot gikan Dalaguete

CEBU - Dose ka sakong Marijuana nga moabot sa 561 ka punoan nga hapit nang anihon gipanglarot sa mga ahente sa Philippine Drugs Enforcement Agency (PDEA-7) atol sa ilang joint operation sa kapulisan sa lungsud sa Dalaguete mga alas 4:00 sa kaadlawon kagahapon sa sitio Lugsangan barangay Tabon sa nahisgutang lungsud.

Usa ka mag-uumang si Jose Ramos, 40, nga dunay walo ka anak ang nadakpan sa akto sa mga sakop sa PDEA-7 ug Dalaguete PNP nga nag-atiman sa marijuana.

Si Intelligence Officer IO2 David Mark Maramba sa PDEA-7 nitug-an nga niadtong Huwebes sa hapon nakadawat sila’g impormasyon gikan sa kapulisan sa Dalaguete nga nangayo’g assistance sa paglarot sa marijuana sa nahisgutang lugar.

Matud pa niini nga nisugod sila sa paglakaw mga ala una sa kaadlawon kagahapon apan naabot sila sa sitio Lugsangan alas 4:00 na sa kaadlawon.

Didto ilang naabtan ug gisignit ang mag-uumang si Ramos nga nagdala pa kini’g guna ug nag-atiman sa maong mga tanom nga giingong karong Enero sa sunod tuig na anihon.

Ang maong mga tanom nakit-an gikan sa duha ka dapit nga pulos iya ni Ramos ug gisagol uban sa mga gabi aron di mahalata ug nahimutang kini sa hilit nga dapit.

Ang dinakpang si Ramos nga nahinabi sa Banat News nitug-an nga usa ka ginganlan og “Candido” ang iyang gipalitan sa usa ka kilong liso sa Marijuana sa sitio Butong barangay Basyaw lungsod sa Badian kasikbit sa ilang barangay.

Matud pa niini nga ang maong mga marijuana niadto lang   bulan sa Hulyo ning tuiga gitanom.

Gibutyag niini nga usa ka ginganlan og ‘Ester” nga taga dinhi sa dakbayan sa Sugbu maoy nisugo kaniya sa pagpalit sa liso ug pagtanom niini.

Ug ang palit niini sa mga pinaugang marijuana mokabat sa tag- P 2mil ang kilo apan ang iyang madawat P100 lang matag kilo.

Sumala pa niini nga niadtong 2005 nananom siya niini apan na-undang ug karon lang usab tuiga nibalik sa pagpananom human siya pasaligi ni Ester nga adunay komisyong madawat.