CPDRC inmates makig-uban sa b-day ni Gov. Gwen ugma

Subling bisitahon ni Governor Gwendolyn Garcia ang mga bilanggo sa Cebu Provincial Rehabilitation Center sa barangay Kalunasan sama sa iyang gihimo kaniadto atol sa iyang adlaw’ng natawhan.

Ang kapin sa usa ka libong CPDRC inmates makig-selebrar sa gobernador karong adlaw’ng Domingo atol sa birthday niini diin gipaabot nga may mga pasundayag ug uban pang kalingawan nga himuon.

Ang gobernador gikatahong manghatag og mga labakara, toothbrush ug toothpaste ngadto sa tanang piniriso sa maong bilanggoan sanglit naandan na niya kining buhaton sa mga piniriso matag kasumaran sa iyang adlaw’ng natawhan.

Si Garcia magsaulog sa iyang ika-53 nga   birthday ugma ug adunay ipahigayon nga Santos nga Misa sulod sa CPDRC nga magsugod sa alas 9 sa buntag diin tambongan sa tanang piniriso unya pagkahuman adunay paniudto nga idalit sa gobernador.

Ang gobernador gikatahong makigkuyog sa mga inmates sa maong salosalo lakip na ang ubang jail ug capitol officials.

Wala pa usab matino kung dunay presentasyon ang nisikat na kaayong CPDRC Dancing Inmates alang sa maong adlaw. Ang dancing inmates misikat na og maayo pinaagi sa Youtube sa internet ug miani og mga pagdayeg di lang sa nasud kundili sa ubang parte sa kalibutan ug nahimo pa hinuon kining tourist attraction dinhi.

Wala hinuon mohisgot ang gobernador kung duna bay “open hour” sa mga modalaw nga mga kabanay nga na-priso sa nahisgutang bilanggoan tungod niining maong kalihokan sa gobernador.