Seguridad sa Haladaya Festival gipahugtan

Gi-doble sa kapulisan ang seguridad sa lungsod sa Daanbantayan nunot niining nagsingabot nga kapistahan ilabina ang pagpahigayon sa tinuig nga Haladaya Festival sa maong lungsod ugmang adlawa.

Matud sa hepe sa Daanbaantayan Police, Insp. Bonifacio Arriesgado dihang nahinabi sa Banat News gikan pa niadtong Biyernes hangtud sa liwas sa fiesta gipatuman nila ang red-alert status alang sa kahusay ug kalinaw atol sa maong kapistahan.

Ning bag-uhay lang dunay tension sa maong lungsod human gi-proklamar ni Judge Antonio Marigomen sa RTC Bogo City si Augusto “Itok” Corro ug runningmate niini nga si Dr. Jose de Leon isip mananaog pagka mayor ug bise mayor subay sa resulta sa election protest batok nila ni incumbent Mayor Sun Shimura og Bise Mayor Maria Luisa Loot.

Ang duha ka kampo milusad og mga lihuk protesta ug thanksgiving mass sayo ning semanaha.

Nunot niini nagpadala og augmentation force ang Cebu Provincial  Police Office (CPPO) nga SRU ug mga bag-ong police nga nag- Field Trainee Program (FTP).

Dugang pang Arriesgado hasta ang Barangay Intelligence Networks gipalihok usab aron pagkuha og mga impormasyon kung duna may mga planong pagpanggubot nga mahitabo.

Gikatahong misaad sad ang duha ka habig nga walay himuong rally atol sa maong pista ug ang ilang mga supporters gimandoang di na mohimo og kaguliyang.