Mga taga Mananga naalarma tungod sa sakit sa 8-anyos

Naalarma ug gibati og kabalaka ang mga residente sa sitio Mananga II, barangay Tabunok, dakbayan sa Talisay niadtong Sabado sa hapon human sa giingong usa sa anak sa ilang silingan ang nataptan sa virus nga severe acute respiratory syndrome kon “SARS”.

Apan si Talisay City Health officer Dr. Lino Alanzado sa pakighinabi niini sa Banat News dali kaayong misalikway niini kagahapon ug nagkanayon nga imposibleng maabot dinhi sa nasud ang nahisgutang virus.

Ang maong virus adto miigo sa mainland Asia diin taas nga hilanat ang bation sa usa ka tawo ug makatakod kini ug makamatay.

Matud niini nagduda hinuon silang ang 8-anyos nga batang babaye gidudahang nataptan og virus nga “meningococcemia” ug padayon pa kining gi-obserbahan.

Apan gipasabot ni Alanzado nga ang mataptan sa virus nga “meningococcemia” sulod lang sa 24-oras mamatay kini dayon apan ang nahisgutang bata mi-survive sa iyang hilanat sulod na sa tulo ka adlaw hinoon luya ang lawas niini.

Ang maong bata naa karon sa South General Hospital sa dakbayan sa Naga ug matud ni Alanzado nga ang resident doctor sa nahisgutang tambalanan ang natahap nga natapan og virus sa “meningococcemia” ang maong bata tungod sa nanggawas nga rashes sa lawas niini ug hilabihang pagkaluya.

Ang nahisgutang pasyente ipaubos sa “lumbar tap” aron kuhaan og tubig sa iyang dugokan o “spinal column” aron ma-eksamin ug mapiho ang sakit nga mitakboy niini apan maghuwat pa og duha ka adlaw una makuha ang resulta sa eksaminasyon.

Si Alanzado nagkanayon nga ang mga nagpuyo sa balay nga kauban sa bata ang gipainom na nila og “prophylaxis” – usa ka klase sa tambal nga antibiotic panagana nga dili matakboyan sa nahisgutang virus kung ugaling positibong meningococcemia ang resulta sa eksaminasyon.

Ang city health officer midugang nga kasagrang maigo sa virus nga “meningococcemia” ang mga bata ug ang mga tiguwang na kinsa hinay og resistensiya sa lawas.

Sa laing bahin, ang kapitan sa nahisgutang barangay Manuel Cabriana sa pakighinabi niini sa Banat News kagahapon sa buntag nagkanayon nga gibati usab siya og kabalaka sa pagkadawat niya sa maong taho hinungdan nga mitawag dayon siya sa city health officer ug kang acting  Mayor Lani Abarquez kabahin niini.