Duha ka tawo nalumos patay

Duha ka tawo ang napalgang naglutaw sa dagat ug pulos wala nay mga kinabuhi sa managlahing dapit niadtong Biyernes ug Huwebes sa hapon.

Napalgang wala nay kinabuhi ang  37-anyos nga si Romel Donaire kinsa giingong hubog  nga milangoy sa dagat ug nalumos diha sa sitio Rattan, barangay Tangke, dakbayan sa Talisay.

Ang mga silingan ni Donaire nagkanayon sayo pa niana gikatahong hubog na ang biktima ug nangaukay nalang sila human kini makit-ing naglutaw diha sa dagat nga wala na maglihok.

Samtang patay na usab nga nakit-an sa dagat ang  usa ka 72 anyos nga lolo diha sa kadagatan sa barangay Bahay lungsod sa Sibonga niadtong Huwebes sa alas 4:00 sa hapon.

Ang biktima giila sa kapulisan nga si Cesario Purisima,72 anyos, usa ka panday ug nagpuyo sa barangay Poblacion sa maong lungsod.

Matod ni SPO1 Ramuel Banugon dihang nahinabi sa Banat News nisuroy ang biktima sa baybayon niadtong tungura aron pagtan-aw sa mga helicopter Philippine Air Force nga nitugpa kay niadtong tungura nagpahigayon og medical mission sa lungsod.

Wala hinuoy nakatug-an kung kini nakit-ang nisawom sa dagat pipila ka gutlo una pa makit-i ang patay'ng lawas niini.

“Nakuyapan siguro na,wala man kunoy paniudto, nabilin pa gani ang sinilas ana sa baybayon,” asoy pang Banugon.

 Ang mga mananagat na maoy nakabangal sa patay'ng lawas sa biktima nga naglutaw-lutaw sa dagat nga gibanlas na sa bawod sa lapyahan.