Cybersecurity sa Pilipinas gitinguha nga palig-onon
CEBU, Philippines — Gitutokan sa gisugyot nga balaodnon ang pagpalig-on sa cybersecurity sa Pilipinas pinaagi sa pagtukod og nasudnong ahensiya nga mangulo sa pagpanalipod sa personal nga impormasyon, kwarta ug importanteng digital infrastructure batok sa cyberattacks.
Ang Senate Bill No. 2248 o gisugyot nga National Cybersecurity and Critical Information Infrastructure Protection Act giduso ni Senator Bam Aquino, chairperson sa Senate Committee on Science and Technology.
Tumong sa maong balaodnon nga magtukod og mas hiniusang pamaagi sa pagpugong ug pagtubag sa cyberattacks ilabi na kay ang gikawat nga personal nga impormasyon mahimong gamiton sa mga scammer sa pagpanglimbong ug pagpangawat og kwarta pinaagi sa internet.
Gipasidaan ni Aquino nga dili lang personal nga impormasyon ang nameligro sa hacking ug data breaches apil usab ang tinigom ug panginabuhian sa mga Pilipino.
Ang maong balaodnon giduso taliwala sa sunod-sunod nga insidente sa cybersecurity sa Pilipinas ug sa ubang nasud.
Gikompirma sa National Privacy Commission (NPC) nga nakadawat kini og mga pahibalo kabahin sa personal data breaches gikan sa 10 ka ahensiya sa gobiyerno lakip ang Bureau of Internal Revenue, Department of Information and Communications Technology ug Department of Labor and Employment.
Natala usab ang daghang cyberattacks sa ubang nasud diin sa Indonesia kapin sa 1.2 milyon ka pagsulay sa cyberattacks ang natala sulod lang sa 24 oras batok sa mga sektor sa banking, finance ug insurance kini base sa threat intelligence data sa FortiGuard Labs. Ubos sa Senate Bill No. 2248, magtukod og National Cybersecurity Agency (NCSA) nga mangulo sa mga paningkamot sa nasud batok sa cyberattacks ug magpalig-on sa proteksiyon sa mga importanteng sestema ug imprastraktura sa impormasyon.
Gitinguha usab sa maong balaodnon nga mahatagan og pagbansay ug tabang sa cybersecurity ang micro, small and medium enterprises (MSMEs) ug mga online merchant aron masiguro ang kaluwasan sa impormasyon sa ilang mga kustomer ug digital operations.
Sa lokal nga lebel, gidasig ni Mandaue City Councilor Carlo Fortuna ang siyudad nga magtukod og kaugalingong cybersecurity division, rapid-response team ug centralized monitoring center aron mapanalipdan ang mga record sa gobiyerno ug personal nga impormasyon sa mga residente.
Giaprobahan sa Mandaue City Council niadtong Lunes ang resolusyon nga nag-awhag sa lokal nga pangagamhanan sa pagpalig-on sa cybersecurity measures lakip ang pagtukod og Local Computer Emergency Response Team ug Security Operations Center ubos sa Management Information Systems Office (MISO). BDB BANAT NEWS
- Latest
















