Drive-by shooting: 5 naangol, panagribal sa gang gisusi

Lima ka mga tawo, tulo niini mga menor ang edad ang nabiktima sa drive-by shooting kagahapon sa kaadlawon diha sa Imus New Road, barangay Lorega-San Miguel ning dakbayan.

Nadala sa Cebu City Medical Center ang mga magsuong nag-edad pa og 17, 16, Thadeo Camacaho 18, walay trabaho , laing 17-anyos nga sakop sa Akrho ug Crisanto Sanchez, 42.

Duha ka wala mailhing lalaking sakay og kolor pula nga motorsiklo maoy gitumbok nga namusil kanila ginamit ang automatic submachine pistol diin usa kanila ang giila lang sa pangalan nga Eric, alyas Titing, nga taga barangay Cogon-Ramos ug sakop sa Crips gang.

Sa imbestigasyon nila ni PO3 Geofrey Gutual ug mga kaubanan sa Homicide Section sa Cebu City Police Office ang upat ka mga biktima nag-uban sa duha ka giingong mga sakop sa Bloods gang nga giilang sila si “Jojie” ug “Wewaks” nanglingkod sa usa ka folding bed daplin sa dalan samtang ang ikalimang biktima naglingkod duol sa pultahan sa ilang gipuy-an.

Sa kalit lang mihunong ang mga gikatahapan ug girakrakan sa angkas niini ang grupo dayon daling nisibat paingon sa barangay Day-as.

Ang unang biktima pulos nangaigo sa wala ug tuong mga batiis, mga bukton, abaga, ug mga dughan.

Nakuha sa crime scene sa Scene of the Crime Office ang 33 ka mga kabhang sa bala sa .9mm, pito ka mga deformed slugs ingon man usa ka metal jacket.

Si PO3 Gutual nga gikahinabi sa Banat News nagkanayon nga gisusi nila karon ang posibilidad nga panagribal sa gang maoy hinungdan sa pagpamusil.

Niadtong niaging Semana Santa tulo usab ka tawo ang nabiktima sa pagpamusil diha sa dalan R.R. Landon duha niini menor de edad.

Usa ka 20 anyos nga sakop sa Crips gang nga ginganlan usab og Eric ang nipatim-aw sa Homicide Section kagahapon aron malimpyuhan ang pangalan ug karon kasamtangan nang gisusi sa kapolisan ang kalambigitan niini sa kaso.