Polis wa mag-helmet gidakop

Gimando kagahapon ni Cebu City Police Office director, Sr. Supt. Patrocinio Comendador nga dakpon ang mga polis nga di magsuot og crash helmet samtang nagmaneho sa ilang mga motor.

Gawas nga dakpon, isyuhan usab sila og citation tickets aron marekord nga duna gyud sila’y nahimong kalapasan, apan gawas pa niana gusto pa ni Comendador nga pasakaan sila og kasong administratiba.

Sumala pang Comendador kung dunay conviction sa ilang paglapas sa Traffic Laws mahimo kining basehan aron ipasaka ang kasong administratiba batok kanila.

Kini gumikan sa kadaghan na sa mga reklamong nadunggan ni Comendador sa nagkadaiyang sektor ug bisan na siya nakakita mismo og mga sakop nga nakaunipormeng magsakay og motorsiklo nga dili magsuot og helmet.

Kagahapon gipatawag ni Comendador ang tanang mga Speed Cops kung motorcycle cops ug gimandoang manakop og mga motoristang dili magsuot og helmet apan ang prayoridad nga target mao ang mga polis.

“Unahon nato ang atong mga polis, we are now zeroing our target against policemen because of the several complaints nga atong nadawat ug bisan na gani ko nakasugat gyud ana,” asoy pang Comendador.

Pipila sa mga motoristang makaagi sa mga random checkpoints nga manakop og walay mga crash helmets ang nakamatikod nga kung polis ang sakay sa motorsiklo bisan walay crash helmet palabyon ra sa mga nagbantay sa checkpoints ug ang uban saluduhan pa gani tungod kay sila mga opisyal.

Nunot usab sa maong mga reklamo dunay gipagawas nga kamandoan ang Police Regional Office 7 kabahin niini nga nagmandong pasuoton gyud og crash helmets bisan na mga polis kung magsakay og motorsiklo.

Kagahapon sa hapon lima ka polis ang giisyuhan og citation tickets sumala pang SPO1 Junivan Villanueva, team leader sa Speed cops.

Usa ka opisyal sa Fuente police station ang gisita gahapon apan tungod sa kaikog wala kini  isyuhi og ticket apan ang maong opisyal giapil sa mga polis nga wala mag-helmet.

Sagad sa nadakpan kagahapon sakop sa CCPO ug usa ka taga Talisay police station.