Malinawonng All Saints Day

CEBU, Philippines — Hapsay ug malinawon ang pagpahigayon sa All Saint’s Day sa Cebu City kagahapon, gawas lang sa usa ka insidente nga dunay electrician nga nakuryentihan sa Carreta Catholic Cemetery sa Barangay Carreta.

Samtang si Cebu Archbishop Alberto “Abet” Uy, gipahinumdoman ang mga magtutuo nga ang pagkabalaan usa ka panawagan para sa tanan.

Walay natala nga dagkong hitabo nga nakabalda sa seguridad sa mga sam-ang sa siyudad bisan pa man sa pagdagsa sa mga tawo.

Sumala pa sa Cebu City Police Office, dunay gibanabanang 14,000 ka mga tawo nga nidagsa sa 21 ka sam-ang sa siyudad gikan sa buntag hangtud sa hapon, ang grabeng kainit sa panahon maoy usa sa gituohang rason nganong gamay ra ang nanuaw sa adlawan.

Apan gipaabot nga modagsa og maayo ini og kagabii ug karong adlawa, kay mao na gyud ang adlaw sa Kalag-Kalag.

Sumala pa ni CCDRMC chairman, City Councilor Dave Tumulak, hangtud ning pagsulat sa balita, hapsay ug walay kasikas gikan sa mga sam-ang.

“Except lang sa Careta ganina, dunay electrician nga kuryentihan, natagak sa Careta,” matud pang Tumulak. Wala pa matino ang kahimtang niini atol ning pagsulat sa balita.

Karung adlawa maoy gipanglantawang maoy daghang mga tawo nga modagsa sa mga sam-ang, apil ana sa mga sam-ang sa mga bukirong mga barangay.

Wa say nakitang problema sa trapiko bisan pa sa pagdagsa sa mga tawo diha sa mga sam-ang. Gidasonan sab kini ni CCTO Assistant Head Kent Francesco Jongoy.

Kapin sa 1,000 ka polis ang gipakatap aron siguraduhon ang kalinaw ug kahapsay sa tibuok siyudad.

Adunay usab 26 ka police assistance desks nga gipahimutang sa nagkadaiyang lugar sa Cebu City aron motabang sa publiko.

Apil sa nibantay ang Bureau of Fire Protection (BFP), Cebu City Disaster Risk Reduction and Management Office (CCDRRMO), ug mga barangay tanod.

Magpadayon ang deployment hangtod sa hapon sa Nobyembre 3 aron apil sa mabantayan ang mga mamauli human sa Kalag-Kalag 2026.

Hagit ni Uy

Sa Cebu Metropolitan Cathedral Mausoleum, gipangunahan pud ni Cebu Archbishop Abet Uy ang Santos nga Misa para sa mga Santos ug gipahinumdoman ang tanan nga ang pagkabalaan dili lang ekslusibo sa pipila kondili para pud kini sa tanang Kristiyano.

“We have a common vocation to become holy in the eyes of God,” matud pa ni Uy sa iyang wali.

Giklaro pud ni Uy, nga kaning All Saints Day dili lamang para niadtong mga na-canonized sa Simbahan kondili apil pud ang dili maihap nga mga kalalakin-an ug kababayen-an nga hilom nga nagpuyo sa pagtuo, gugma ug pagkabalaan.

Gipasabot sab ni Uy nga ang mga santos dili mga tawong perpekto og kinabuhi kondili mga tawo silang wala mohunong sa pagpaningkamot aron sila molambo bisan pa sa ilang kahuyang og kapakyasan.

Nidalit sab ang arsobispo para sa mga nitaliwang mga magtutuo. — /IBM (BANAT NEWS)