DepEd nipagawas og guidelines batok sa epekto sa El Niño
CEBU, Philippines — Nagpagawas og bag-ong guidelines ang Department of Education (DepEd) aron maandam ang mga eskwelahan sa tibuok nasud batok sa grabeng El Niño nga gilauman molungtad hangtod sa tunga-tunga sa 2027.
Ubos sa DepEd Memorandum No. 64, series of 2026, miingon si Education Secretary Sonny Angara nga tumong niini nga mapanalipdan ang mga estudyante ug kawani batok sa grabeng kainit, kakulang sa tubig ug mga sakit nga mahimong resulta niini. Matud ni Angara, kinahanglan nga sayo pa lang mangandam na ang mga eskwelahan imbes nga maghulat pa nga mograbe ang kainit sa panahon. Pinaagi sa maong guidelines, gitugotan ang mga school head nga modesisyon kon ipadayon ba ang face-to-face classes, pamub-on ang oras sa klase o ibalhin kini sa laing pamaagi sa pagkat-on, depende sa kahimtang sa ilang eskwelahan. Aron mahimo kini, girekomendar sa DepEd ang paggamit sa 4H framework—ang Hayo level, Hinay level, Hinga level, ug Hinto level—nga nagbase sa temperatura ug humidity nga sukdon matag adlaw sa alas 8 sa buntag, alas 12 sa udto ug alas 2 sa hapon. Sa Hayo level, kon ubos sa 27 degrees Celsius ang temperatura, magpadayon ang face-to-face classes uban sa regular nga water breaks, samtang sa Hinay level nga 27 hangtod 32 degrees Celsius, mahimong pamub-on ang oras sa klase o magpatuman og hybrid ug flexible home-based schedules. Sa Hinga level nga 33 hangtod 41 degrees Celsius, suspensohon ang face-to-face classes ug hatagan ang mga estudyante og mas gaan nga buluhaton sa balay, samtang sa Hinto level nga 42 degrees celsius pataas, hingpit nga suspensohon ang tanang pisikal ug home-based academic activities alang sa ilang kaluwasan.
Kinahanglan usab siguruhon sa mga eskwelahan nga adunay kini kasaligan nga suplay sa tubig, mga estasyonan sa mainom nga tubig ug water filtration kits kon gikinahanglan.
Mangandam usab ang DepEd og alternatibong suplay sa pagkaon aron magpadayon ang School-Based Feeding Program, ilabina alang sa mga estudyanteng nagsalig niini.
Lakip pa sa mga lakang sa ahensya ang pagsusi sa mga instalasyon sa kuryente, paglimpyo sa mga uga nga tanom aron malikayan ang sunog ug pagtan-aw sa posibilidad sa paggamit og solar energy.
Mahimong gamiton sa mga eskwelahan ang ilang Maintenance and Other Operating Expenses (MOOE), Special Education Funds (SEF) through Local School Boards, Disaster Preparedness and Response Program (DPRP) allocations, ug emergency procurement rules ubos sa New Government Procurement Act (RA 12009) aron pondohan ang mga pagpangandam.
Epektibo dayon ang memorandum ug magpabiling ipatuman hangtod ideklarar sa PAGASA nga natapos na ang 2026–2027 El Niño episode. — /MEL (BANAT NEWS)
- Latest




















