Pagpalit og refrigerated van gikwestyon

Gikwestyon sa mga konsehal sa Dakbayan sa Sugbo ang pagpalit og refrigerated van nga nagkantidad og P7 milyon alang sa mga mag-uuma diin matud pa nga mas angayan nga unahon sa siyudad ang pagsulbad sa kakuwang sa suplay sa tubig sa mga bukirang barangay samtang nagkaduol ang hulga sa El Niño.

Girekomendar ni Konsehal Pastor “Jun” Alcover Jr. kinsa tsirman sa Committee on Agriculture and Rural Development nga dili lang una ipadayon ang pagpalit sa maong refrigerated van tungod kay kuwang pa ang komprehensibong El Niño preparedness and response plan gikan sa City Agriculture Department (CAD) ug way pulos ang refrigerated van kon mokunhod ang produksiyon sa mga mag-uuma tungod sa huwaw.

Misugyot usab si Konsehal Harry Eran nga unahon ang mga programa sa pagsiguro sa suplay sa tubig alang sa mga mag-uuma tungod kay kung walay tubig, walay ibutang sa refrigerated van.

Gipangutana usab ni Alcover nganong wala una gikonsiderar ang pagpalit og water tanker kun diin aduna na siya’y gisugyot nga yunit nga ihatag og tagsa sa amihanan ug habagatang bahin sa siyudad.

Si Bise Mayor Tomas Osmeña miuyon nga kinahanglan hatagan og prayoridad ang mga proyekto sa tubig ug irigasyon tungod kay dili angayan nga magsalig ang mga mag-uuma sa uwan aron nga dili ubos ang produksyon sa lagutmon sa merkado.

Mao nga nagkahiusa ang konseho nga mohangyo kang Mayor Nestor Archival nga magtukod og special body nga magtuon ug motutok sa suplay sa tubig alang sa mga mag-uuma ilabi na sa panahon sa huwaw.

Sa laing bahin, gipahibalo ni Konsehal Alvin Arcilla kinsa mao ang nangamahan sa resolusyon nga naaprobahan na ang ?7 milyon nga pondo alang sa refrigerated van ubos sa 2026 Local Development Fund.

Apan si Eran miinsister nga mahimo gihapong susihon kon ang maong pagpalit angay ba nga unahon bisan naaprobahan na ang alokasyon.

Sa katapusan, ang mga konsehal niawhag sab sa CAD nga kinahanglan una nga mosumiter kini og detalyadong plano sa paggamit, listahan sa mga benepisyaryo, gasto sa operasyon ug maintenance, ug assessment sa kasamtangang mga pasilidad ug pending nga proyekto sa agrikultura sa dili pa ikonsiderar ang pagpalit sa maong refrigerated van. — /MEL (BANAT NEWS)