Pasugalan sa Paknaan gironda

Mga kahimanan sa ginadiling sugal nga tong-its, binggo social ug armas ang gisakmit sa mga polis sa dakbayan sa Mandaue ug walo usab ka mga sugarol ang nasikop sa sitio Baki-Baki, Maguikay, siyudad sa Mandaue ug Zone Tamati, sa Paknaan.

Ang mga nadakpan nga nagdula og tong-its mao sila si Enrico Jumalon, 29, Leo Flores, Juanito Violita, 22 ug Charlie Arambala, 26, minyo nga taga Jagobiao, Mandaue.

Ang upat naaktohan nila ni PO1 Dionesio dela Pena ug mga kauban sa kapolisan sa maong dakbayan nga nagdula og tong-its nga maoy hinungdan sa pagkasakmit sa mga baraha ug salapi nga ilang gipusta.

Dugang nga nadakpan mao sila si Ramon Paran, 67, minyo nga taga Cantabaco, Toledo, Troy Monteron, 18, Allan Jose Villaber, 27, Lowen Paran, 36, taga Salcon, Naga.

Sa akto usab nga nagdula og binggo social ang mga suspetsado ug nasakmit sa mga polis gikan kanila ang 11 ka collection board, imbudo, basket pingpong ug usa ka shotgun nga may upat ka bala ug walo usab ka mga live nga bala sa kalibre 22 nga armas.