Sindikato's yuta utok sa pasangil batok Fusilero

Ang mga opisyales sa Kantipla Ecosystems Enhancement and Protection (KEEP) Foundation, Inc. mitataw nga sindikato sa pagpamaligya og mga yuta sa bukirang barangay maoy nagpaluyo sa kampanya nga mapapahawa ang ilang grupong nananom sa Sitio Kantipla, bukirang barangay sa Tabunan ning dakbayan.

Si Atty. Armando Alforque, kalihim ug tigpamaba sa KEEP Foundation, mibasol sa kadagkuan sa City Assessor's Office nga nagsige og pang-isyu og tax declaration ngadto sa mga lumolupyo sa Sitio Kantipla nga maoy gigamit sa pagpamaligya niini ngadto sa mga adunahan ug mga negosyante.

Ang KEEP, matud niya, maoy nag-ugmad sa 504 ektaryas nga luna pinaagi sa memorandum of agreement sa KEEP ug DENR, pinaagi ni kanhi Sec. Antonio Cerilles, tungod sa programa sa gobiyernong "Adopt a Mountain Program." Tungod niini, ang KEEP nakatanom na og 146 mil ka mga punoan sa kahoy sukad sa tuig 2001.

Si Alforque mipakita og kopya sa tax declaration nga pinirmahan ni City Assessor Palermo Lugo alang sa luna nga naa mahimutang sa Kantipla.

"Magsige sila'g pang-isyu og tax declaration nga di gani tan-awon asa mahimutang ang yuta," sumala pa ni Alforque, kinsa miingon nga ubos sa National Integrated Protected Area System Law, dili mahimong matitulohan o mapanag-iya ang luna sa Kantipla tungod kay "protected area" kini tungod kay nahisakop kini sa watershed area.

Gipasanginlan usab ni Alforque si provincial environment and natural resource officer Richard Abella ug Security Service Group chief Mariano Natuel nga midapig sa maong sindikato.

Matud niya nga si Abella makahibulong kaayo tungod kay mipakita na kini og paglaban sa usa ka negosyanteng nanag-iya og farm sa Kantipla nga naila sa ngalang Betty Rivero nga mao man unta kini ang mikiha sa naulahi sa dihang nakahimo kini og kalapasan sa balaod sa kalikupan.

Gihimakak usab ni Alforque ang taho nga pagpang-harass ni retiradong Heneral Tiburcio Fusilero sa mga mag-uuma. Matud niya nga si Atty. Ben Bongon makadaghan na motambong sa gipatawag nga hearing ni Kapitan Felix Abella sa Labangon, kinsa maoy gitahasan ni Mayor Tomas Osmeña pag-imbestigar sa mga reklamo, apan walay usa nga mipatim-aw.

"Walay complainant. Kay dili man tinuod nga dunay harassment," si Alforque miingon, kinsa midugang nga ang gipalutaw nilang reklamante dili mga residente sa lugar nga nakapahimulos sa balaod sa NIPAS isip mga "tenured migrant."

Gihagit hinuon niya silang Abella ug Natuel sa pagdakop niadtong mga tawo nga nagsugod na karon og pamutol sa mga kahoy sa pagsikop kanila, lakip na kadtong mga nangoral na sa luna sulod sa gidumala sa KEEP tungod kay nangangkong nakapalit na niini.

Sumala pa ni Fusilero ug Alforque nga gitun-an nila ang posibilidad nga mapasakaan og kaso kadtong mga nalambigit sa maong sindikato.