Greenhouse unit gi-turnover sa DA ngadto sa siyudad sa Sugbo

CEBU, Philippines — Gi-turnover sa Department of Agriculture-7 ang usa ka greenhouse unit nga anaa sa South Road Properties ngadto sa Kagamhanan sa Dakbayan sa Sugbo.

Atol sa maong turnover, gitambungan kini ni Mayor Raymond Alvin Garcia, DA-7 chief administrative officer Quian Ibarra ug si Konsehal Pastor “Jun” Alcover Jr. kinsa maoy overseer sa City Agriculture Department.

Ang maong greenhouse unit adunay hydroponics, nga usa kini ka teknik sa pagpatubo sa mga tanom gamit ang water-based nutrient solution kaysa sa yuta.

Sa report sa Cebu City Public Information Office nga gikalipay og maayo ni Mayor Raymond Alvin Garcia ang pagbaton sa maong pasilidad tungod kay magamit kini sa CAD.

“Hopefully, kini siya will be a model for us in the future to follow, not only here but didto sad sa kabukirang barangay…. I’ve been to many countries around the world, naa sad koy gipangbisita sa Israel, South Korea, even in the Netherlands, ang technology duna pud ingon ani. Mao na nga nakaingon ko akong kaugalingon nga kani siya hulog ng langit ni siya nga ila ning gitudlo nato unsaon,” suma pa ni Mayor Garcia.

Ang maong greenhouse unit gisugdan kini sa DA-7 niadtong buwan sa Mayo niining tuiga.

Samtang ang pagpatukod sa maong pasilidad mobalor og P997,000.00. — /MEL (BANAT NEWS)