PSG namun-og 3 bata

Usa ka sakop sa Presidential Security Group (PSG) gipasanginlang namun-og og tulo ka minor de edad kinsa gikatahong nangawat niadtong Biyernes sa buntag didto sa barangay Lawaan, dakbayan sa Talisay.

Ang nahisgutang PSG nailhan nga mao si Technical Sergeant Roman Hermosada, residente sa maong lugar ug usa na ka tuig nga nadestino sa Malacañang of the South niining dakbayan.

Base sa imbestigasyon sa kapolisan sa Talisay nga ang bayaw ni Hermosada nga si Belen Hermosada misinggit dihang nakita ang tulo ka mga bata didto sa sulod sa ilang compound diin daghan nang higayon nga sila makawatan sa ilang mga gamit.

Dali nga midagan ang tulo ka nahisgutang mga bata apan nasikop kini ni Hermosada kinsa mitugyan kini sa maong mga bata ngadto sa sub-station sa kapolisan sa Talisay diha sa barangay Lawaan.

Ang mialegar nga nakulatahan mao sila si Warren, 15 anyos, kinsa nakaangkon og paksit sa walang aping ug bukol sa ulo ug mga bun-og sa lawas; Edmer 13, nakaangkon og black eye sa tuong mata ug mga bun-og sa lawas ug Arnel Tura 17, kinsa nakaangkon usab ug bun-og sa iyang lawas.

Ang maong mga bata pulos mga residente sa barangay Lawaan sa nahisgutang siyudad.

Matud pa sa tulo sa pakighinabi niini sa Banat News kagahapon nga gipabuthan sila og armas ni Hermosada ug gipugos sila og pasulod sa compound sa gipuy-an niini diin si Arnel giduslak sa sumbohan sa pusil ni Hermosada.

Ang tulo midugang nga si Hermosada mikuha og sako para isulod ang usa ka jack sa truck diin gipasangil nga kuno ilang gikuha.

Ang Banat News napakyas sa pagkuha og pamahayag gikan ni Hermosada dihang miadto kini sa Malacañang of the South tungod kay ang naulahi mipahigayon og ocular inspection.

Si Capt. Dominic Baluga, commanding officer ni Hermosada, nagkanayon nga mopahigayon siya og imbestigasyon sa maong insidente ilabi na nga menor de edad ang mga biktima.