Cordova andam na sa Bakasi Festival

Ang bakasi nga usa ka matang sa isda ang giisip nga mao gayod ang nag-unang produkto sa kadagatan nga abunda niini sa lungsod sa Cordova, Sugbo.

Mao kini ang pamahayag ni Mayor Arleigh Sitoy nga gikahinabi sa Kapihan sa DYKC niadtong miaging adlaw.

Kini ang hinungdan nga ang naandang Dinagat Festival nga maoy pagahimoon sa matag Domingo sa dili pa pagahimoon ang adlaw sa tinuig nga pangilin sa Cordova, gihimo na karon nga Bakasi Festival.

Gipasabot ni Sitoy nga kini ilang gihimo sa tinguha nga ma-promote usab ang ilang lungsod nga maoy dapit sa mga bakasi dinhi sa Sugbo.

Sumala ni Sitoy nga kusog ang panginahanglan sa maong matang sa isda sa ilang lungsod sanglit daghan man usab ang mokaon niini ilabi na gayod niadtong anaa na sa naghiniguwang nga panuigon sanglit giingon man nga makapalagsik kini sa pagkalalaki.

Gipahibalo ni Sitoy nga ang Bakasi Festival gikatakda nga ipahigayon karong Agosto 14 sa bisperas sa adlaw sa kapistahan sa maong lungsod sa petsa 15.

Dugang pa niya nga may igong kalainan ang Bakasi Festival nga masaksihan sa mga mosud-ong sa maong kalihokan kon itandi sa Dinagat Festival nga ilang gipahigayon sa nangaging mga tinuig nga pangilin.

Giklaro usab niya nga ang maong festival nga unang gipahigayon karong tuiga ang pagaapilan usab sa mga contingent nga ilang gidapit gikan sa uban nga mga lungsod ug mga lalawigan. - Romeo T. Limpangog