Pag-sorry ni GMA gidayeg ni Gwen ug ubang kaalyado

Mga kaalyado ni Presidente Gloria Arroyo dinhi sa lalawigan sa Sugbo mihangop sa pagpangayo og pasaylo niini ug mihulagway nga panahon na gyud nga buakon sa lider sa nasud ang mga isyong gibato batok kaniya ug sa pamilya niini.

Si Gobernador Gwendolyn Garcia sa pakighinabi sa Banat News mihulagway nga usa ka talagsaong pagpakita sa kaisog ang pagpangayo sa pangulo og pasaylo atubangan sa kapin 80 milyones ka mga Pilipino.

"It's an act of courage nga akong gilantaw'ng talagsaong pagpakita og kaisog ang pagpangayo og pasaylo sa tibuok nasud usa gud siya ka presidente," asoy pa ni Garcia.

Nunot sa maong pagpangayo og pasaylo si Garcia misubli ug miklaro nga si Arroyo mitumaw nga mananaog dinhi sa lalawigan "fairly and squarely" ug walay tikas nga nahitabo.

Nanawagan si Garcia sa mga kaubanan sa administrasyon nga angayan nang undangon ang pagsige og bingkil sa usag-usa ug dili itugot nga mopagamit sa oposisyon.

"Let's move on undangon ta na ning pagsige og panagbingkil kay gigamit ra ta nga hinagiban sa oposisyon," asoy pa ni Garcia.

Samtang ang kanhi gobernador sa lalawigan Pablo Garcia sa usa ka interbyu sa lokal nga sibyaanan miklaro nga walay balaod nga nalapas ang pangulo sa pakig-istorya sa usa ka opisyal sa eleksyon.

Si kanhi Gobernador kinsa nailang "constitutionalist" sa nasud midugang nga dili magamit sa giplanong "impeachment" ang pagpangayo og pasaylo ni Arroyo.

Si Presidente Arroyo atubangan sa telebisyon nangayo og pasaylo sa katawhan gumikan sa giangkon niining sayop nga mao ang pagtawag sa usa ka eleksyon officer, may labot kini adtong "Hell Garci" tape nga gipasangil nga ebidensiya sa pagpanikas sa kampo ni Arroyo adtong milabay'ng eleksyon.

Samtang ang kanhi pangulo sa nasud nga si Corazon Aquino mihangop usab sa pagpangayo og pasaylo ni Arroyo ug mihulagway nga sipyat si Arroyo sa iyang nahimo nga wala niini mapanglantawi ang mamahimong epekto. Hinuon si Aquino mibilib sa gihimo ni Arroyo ug nanawagan sa katawhan sa pag-ampo ug pagsuporta sa mga proyekto niini.

Ang labing lanog ug mga pamahayag ug usa sa mga lig-ong senador nga si Senador Miriam Defensor Santiago namahayag nga walay nahimong sayop si Arroyo bisan sa paghukom kung husto ba o dili ang pagtawag niini sa usa ka "election officer" ug walay basehan ang tanang panawagan sa pag-resign ug pagpa-impeach sa pangulo.

Si Senate President Franklin Drilon midayeg usab sa gihimo ni Arroyo ug matud pa niya nga dili sayon ang gihimong pagpangayo ni Arroyo ug pasaylo isip usa ka pangulo ug midugang nga walay "legal offense" nga nahimo si Arroyo.

Apan si House Minority Leader Francis Escudero miawhag nga bisan sa pagdawat sa oposisyon sa pagpangayo og pasaylo kang Arroyo gikinahanglan gyud gihapon nga ipadungog sa katawhan ang maong tape nga dunay indikasyon sa planong pagtikas adtong 2004 election.