Laing holdup sa taxi

Tulisan og taxi nakabiktima na usab bisan sa hulga sa "vigilante". Ang insidente nahitabo diha sa dalan Macopa, barangay Mambaling ning dakbayan kagahapon sa kadlawon.

Si Marlon Fajardo, 26, anyos, molupyo sa Candulawan, dakbayan sa Talisay nakasugamak sa tulo ka gikahadlukang mga mamiktimahay og mga taxi nga naglibod-suroy diha sa habagatang bahin sa dakbayan.

Matud pa ni SPO4 Elden Miñoza sa Mambaling Police Station ngadto sa Banat News ang biktima gipara sa mga suspek diha sa duol sa usa ka panaderohan sa naasoyng lugar ug nagpahatud sa Basak-Pardo.

Apan dangtan pila ka minutos usa sa mga batan-on ang mimando kaniya sa pagbalik sa agi sanglit dunay nalimtang "cellphone" apan sa pagbalik na sa biktima diha may dalan Macopa gikatahong kalit siyang gitiunan sa mga suspek ug mahait nga hinagiban dayong anunsyong tulis.

Matud pa sa biktima wala siya'y nahimo dihang giduot sa iyang liog ang usa ka kutsilyo hinungdan nga nakuha gyud ang iyang P1,800 nga kinitaan, pitaka nga may mga importanteng dokumentos ug relo de pulso nga nagkantidad og P400.

Human mahimulbuli ang biktima pugsanong gipakanaog si Fajardo sa tulo dayong ikyas dala ang iyang taxi nga Marmick Taxi nga Nissan kolor puti ug may plakang GVR-118.