City hall man gipusil, kritikal; sakop sa Akrho ang suspek

Human sa pila ka adlaw nga pagpakahilom sa notadong hitman sa Alpha Kappa Rho nga si Arestotle "Ares" Aves ang suod nga kauban niini mao usab ang misiaw ug namusil sa milabayng gabii sa usa ka kawani sa Cebu City Hall.

Ang nabiktima tungod kay naalaang asset sa mga polis giilang si Ramos Jumao-as,46, minyo ug molupyo sa dalan B.Aranas Extension Sitio Laguna Barangay Duljo-Fatima ning dakbayan kinsa gikatahong kawani kini sa Market Authority sa dakbayan.

Si PO3 Rogelio Nedamo sa Homicide Section mibutyag sa Banat News nga gitumbok sa mga lumolupyo mao si Sonny dela Cruz nga nailhang sakop sa Akrho ug maoy kauban kanunay ni Aves sa pipila na ka krimen nga gihimo sa naulahi.

Sumala pa ni Nedamo kasamtangang naglakaw ang biktima kinsa padulong na unta sa trabaho isip tig-isyu og tiket sa mga vendors diha sa Carbon Market dihang kalit gibabagan sa suspek diha sa may eskinita sa ilang lugar.

Way daghang kuskos balungos kalit gipusil sa suspek si Jumao-as hinungdan sa pagkaagom niini og samad pinusilan diha sa iyang abaga nga milapos diha sa ilok, buko-buko ug sa luyo sa hawak.

Human sa insidente matud pa ni Nedamo ang grupo ni dela Cruz ang nakit-ang nagdinaganay palayo sa nahitaboan samtang gisubay sa mga tawo ang lugar aron tabangan si Jumao-as.

Matud pa ni PO3 Nedamo duna nay nagpaabot arrest warrant si dela Cruz tungod sa mga kasong gikalambigitan nilang duha ni Aves kinsa duna usab dili momenus walo ka mga kasong pagpatay.

Midugang si Nedamo dili palang dugay gikatahong nalandig na sa usa sa mga pampublikong tambalanan dinhi sa dakbayan si dela Cruz human makaengkwentro og pinusilay ang grupo sa ribal nga fraternity sa Tau Gamma Phi diha sa Duljo-Fatima apan una pa maabti sa kapolisan miikyas na kini.

Si PO3 Alvin Motebon sa Mambaling Police Station mitug-an sa Banat News nga dugay na usab nga nagpabadlong kini si dela Cruz diha sa ilang hurisdiksyon.